Teposhtëza e Xhakës: Nga Arsenali te një ekip që rrezikon rënien nga Bundesliga

Është raportuar se për mesfushorin zviceran me origjinë kosovare ka pasur disa ekipe të interesuara, por asnjëra në nivelin e klubit aktual.

Xhaka u përfshi në muajin nëntor në një incident të shëmtuar kur e grisi fanellën e ekipit të tij pas brohorimave tallëse të tifozëve revolvërist, përcjell Periskopi.

Por, pse nuk e donin Xhakën tifozët e Arsenalit?

Xhaka është një ndër transferimet më të shtrenjta të këtij klubi, me një shifër që raportohet se shkonte deri në 40 milionë euro. Megjithatë, paraqitjet e tij për klubin nga Londra e Veriut kanë qenë tepër zhgënjyese.

Ai ka bërë pasime tepër të pasakta dhe ndërhyrje aspak të mençura. Shkaku i gabimeve të tij, ekipi i Arsenalit kishte pësuar shumë gola – dhe kjo kishte bërë që në disa raste ai të mos paraqitej fare por të shikonte ndeshjet nga banka rezervë. Madje, është i njohur rasti kur Xhakën e kishte vënë si mbrojtës të krahut të majtë trajneri Unai Emery.

Por, cili do të jetë ekipi i ri i tij?

Mesfushori më i shtrenjtë me origjinë shqiptare do të jetë pjesë e Herthës së Berlinit prej vitit të ardhshëm. Megjithatë, Hertha e Berlinit nuk është një ndër ekipet më të mira gjermane, duke qenë vazhdimisht në pjesën e poshtme të tabelës. Ky ekip as që mund të krahasohet me ekipin e mëparshëm të Xhakës, Borussinë e Monchengladbachut.

Edhe këtë sezon, derisa Monchengladbach është në vendin e dytë me 35 pikë, Hertha e Berlinit është në vendin e dymbëdhjetë me vetëm 19 pikë dhe në rrezik serioz për të rënë nga liga.

Nëse gjërat shkojnë keq, Xhakën mund ta shohim prej verës së ardhshme në Bundesliga 2 të Gjermanisë.

Kjo është një ndër ecuritë më të dobëta të një futbollisti ndonjëherë. /Periskopi