Gjuriq ia qet Kurtit: Për ta formuar qeverinë duhet të trokitet në derën e Listës Serbe

Duket se qëndrimet e tij nuk janë zbutur nga takimi për kafe që e kishte me z.Xhelal Sveçla, Arban Abrashin e LDK-së dhe Ardian Gjinin e AAK-së.

“Krahina jonë sikur të ishte Belgjika për sa i përket konstituimin të institucioneve, por ne ngadalë po marrim rezultate fenomenale për Listën Serbe dhe për mua është lajm i vitit që serbët kanë rënë dakord dhe kushdo që dëshiron të formojë qeverinë, duhet të trokasë në derën tonë”, tha Gjuriq në një bisedë për televizionin publik të Serbisë.

Ai më tej shtoi se serbët në Kosovë janë të gëzuar me mbështetjen që iu jep shteti i tyre, Serbia, dhe e cila po punon për qëndrimin e tyre të mëtejmë në Kosovë.

Kujtojmë se z.Gjuriq kishte marrë pjesë në një konferencë në Tiranë gjatë këtij muaji, ku kishte pasur takim madje edhe me z.Xhelal Sveçla nga Lëvizja Vetëvendosje – parti që më parë ishte krejtësisht kundër përfshirjes së Listës Serbe në Qeverinë e Kosovës.

Tashmë, z.Kurti ka deklaruar hapur se do t’iu japë një ministri serbëve, ndërsa në ofertën drejtuar LDK-së [dhe e cila ishte refuzuar] ai bënte me dije se kjo ministri do të ishte ajo “për kthim dhe komunitete”. /Periskopi