Dresheviq më i mirë se Muriqi e Rashica, shpallet “Dardani i Javës” (Video)

Tifozët e Fenerbahçes dhe të Kombëtares së Kosovës ishin nën ankth të madh ditën e diel. Gjiganti turk luante kundër Sivassporin që ishte në vendin e parë, dhe i duhej dëshpërimisht fitorja që të ngjitej në pozitën tabelare. Që të paktën të shpresonte për titullin kampion. Kjo ndeshje duhej luftuar “për vdekje”. Dhe Muriqi ishte lojtari kryesor i ekipit që ndjellte shpresë.

Por, gjithçka përfundoi në mënyrën më të keqe të mundshme. Fenerit iu përjashtuan dy lojtarë. Muriqi i frustruar për pak sa nuk u rrah me bashkëlojtarin e tij, Ozan Tufan. Humbi 3-1. Dhe përfundimisht mbeti jashtë luftës për titull, dhe madje aktualisht edhe jashtë zonës së garave evropiane.

Dobët luajti edhe Milot Rashica i Werder Bremenit. Ekipi i tij bazohej shumë te kundërsulmet e rrezikshme në mënyrë që të mbante Bayernin të frikësuar. Por, ja që Rashica rrëshqiste e rrëshqiste. Arriti të shënonte një gol, por kaq. Në shumë raste tjera, ai rrëshqiti dhe humbi duele vendimtare. Werderi u mposht 6-1 dhe tashmë është vetëm një pozitë nga zona që e dërgon në Bundesliga II, shkruan Periskopi.

Celina u paraqit për Swansea Cityn dhe e bëri një asistim. Aro Muriq sërish nuk u paraqit. Zhegrova nuk vlen as të përmendet.

Sidoqoftë, “Dardani i Javës” është qendërmbrojtësi Ibrahim Dresheviq që luan te Heerenveen. Ekipi i tij humbi, por Dresheviqi u paraqit në mënyrë solide. Ylli i Kosovës vazhdon të jetë i paprekshëm në formacionin startues të ekipit të tij. /Periskopi