Dardani i Javës: Muriqi në qiellin e shtatë, shumë lojtarë të Kosovës po zhgënjejnë

Muriqi shënoi dy gola në një ndeshje të mirë për ekipin e tij. Me këtë fitore, Fenerbahçe është në vendin e pestë me pesë pikë më pak se vendi i parë, Sivasspori.

Pa asnjë diskutim, Muriqi është DARDANI I JAVËS. Por, lojtarët e tjerë nuk ia dolën të kishin rritje në formën e tyre ose nuk u futën fare në lojë, shkruan Periskopi.

Amir Rrahmani ishte mbrojtësi më i mirë i Hellas Veronës, por ai megjithatë bëri disa gabime gjatë ndeshjes dhe në një rast u turpërua nga sulmuesi i Atalantas, Luis Muriel. Verona e humbi ndeshjen në fund 3-2 me golin e shënuar nga Berat Djimsiti i Shqipërisë.

Ibrahim Dresheviq luajti nga minuta e parë për Heerenveenin në një fitore tjetër të ekipit të tij. Ai po bën krenare Kombëtaren e Kosovës, dhe pa dyshim se kjo rritje në përvojë dhe në formë do t’i japë mundësi më të mëdha edhe te ekipi ynë kombëtar.

Zhgënjim i madh është Bersant Celina. Ai jo vetëm që nuk luajti, por nuk ishte as pjesë e bankës rezervë të Swansea Cityt në humbjen turpëruese ndaj West Bromit.

Trajneri i tij tha se e kishte lënë Celinën jashtë “për arsye taktike”.

Aro Muriq po ashtu vazhdoi të ishte në bankën e Nottingham Forestit.

Ndërkohë, Zhegrova luajti nga fillimi për Baselin por nuk është se bëri paraqitje të jashtëzakonshme si në javën e kaluar.

Rashica në anën tjetër, me ekipin e tij humbi nga Paderborni në shtëpi duke e lënë trajnerin e tij Florian Kohfeldt me mundësinë e largimit nga klubi. Werderi këtë sezon po lufton për mbijetesë edhe pse ka ekip shumë të mirë. /Periskopi