Çfarë pritet të ndodhë nesër në seancën konstituive të Kuvendit?

Nesër Kuvendi i Kosovës do të mbajë seancën konstituive në të cilën parashihet të zgjidhet kryetari dhe nënkryetarët e Kuvendit të Kosovës.

Megjithëse ende nuk ka një marrëveshje finale ndërmjet Lëvizjes Vetëvendosje dhe Lidhjes Demokratike të Kosovës për formimin e koalicionit qeverisës,  nuk dihet nëse partia e parë që doli në zgjedhjet e parakohshme parlamentare të 6 tetorit, LVV do të propozojë kandidatin për kryetar të Kuvendit.

Njohësi i çështjeve politike në vend Shkëlzen Maliqi, i ka thënë Periskopit se pret që marrëveshja LVV-LDK të arrihet me kompromisin e Vetëvendosjes për t’i lënë LDK-së mundësinë për propozimin e Presidentit, por në një moment tjetër, më vonë.

“Opsioni i parë është, ajo që është pritur edhe me herët, arritja e kompromisit rreth postit të Presidentit në moment të fundit. Mendoj se zgjidhja më e afërt është që LDK-së t’i pranohet e drejta me e propozua Presidentin, por më vonë kur afrohet koha për zgjedhjen e Presidentit të ri. Mund të ndodhë edhe ndonjë version tjetër i kompromisit, por nëse nënshkruhet koalicioni ecuria e mëtutjeshme është e garantuar dhe qeveria zgjidhet dhe fillon punën gjatë janarit”, ka thënë Maliqi.

Por sipas analistit të njohur kosovar, nëse nuk ka marrëveshje në mes LVV-së dhe LDK-së atëherë rrezikohet shkuarja në zgjedhjet jashtëzakonshme  në pranverë.

“Nëse s’ka marrëveshje sendet komplikohen, mund të dështojë procesi dhe të shpallen zgjedhjet në pranverë. Kjo do të ishte një situatë tejet e lodhtë që në përgjithësi nuk pëlqehet”,  ka thënë Maliqi.

Megjithatë, në rast se LVV dhe LDK nuk arrijnë të finalizojnë marrëveshjen për koalicionin qeverisës,  praktika e deritanishme ka treguar se nuk dihet se kur do të përmbyllet seanca me zgjedhjen e kryetarit dhe nënkryetarëve.

Vonesat eventuale në konstituimin e Kuvendit nuk do të mund ta vinin në lëvizje as Gjykatën Kushtetuese, qoftë nga presidenti apo ndonjë organ tjetër.

Kjo është parë në dy palë zgjedhjet e fundit, ku kryeparlamentari ishte zgjedhur pas bllokadave në mungesë të marrëveshjes së koalicionit, ndërsa në vitin 2014 u kërkua interpretim prej Gjykatës Kushtetuese pas gjashtë muajsh bllokadë,

Rregullorja e Punës së Kuvendit nuk parasheh çka ndodhë nëse votimi  për kryetarin e Kuvendit i propozuar nga partia që ka dalë e para në zgjedhje është negative.

Megjithatë, Gjykata Kushtetuese ka sqaruar se propozimin për kryetar të Kuvendit e mban ekskluzivisht grupi më i madh parlamentar, qe i bie Lëvizja Vetëvendosje. Nëse nuk kalon i pari, duhet konsensus për emrin e propozimit tjetër të VV-së.

Meqenëse nuk ka afat për konstituim të Kuvendit, dhe veç LVV e ka të drejtën për propozim të emrit për kryeparlamentar, seanca mund të bllokohet.

Në seancën e nesërme ajo që pritet të ndodhë me siguri është betimi i deputetëve të legjislaturës së re. /Periskopi/