Zyrtari i AAK-së: Të formohet një qeveri gjithëpërfshirëse në krye me Albin Kurtin

Kryetari i komunës së Junikut nga radhët e AAK-së, Agron Kuçi, ka propozuar që të formohet një qeveri gjithëpërfshirëse në krye me Albin Kurtin.

Sipas Kuçit, kjo do të rezultonte me suksesin e Kosovës në proceset e vështira e të mëdha që janë përpara.

Sipas tij, Albin Kurti e ka rastin unik dhe mundësinë historike që të formojë këtë qeveri uniteti.

‘Sot Albin Kurti, ka rastin unik dhe mundësin historike si fitues i zgjedhjeve te 6 Tetorit, të formoj QEVERI UNITETI të përbërë nga VV, LDK, PDK dhe AAK, me premisën e vetme që vendi ynë-Kosova t’ia del suksesshëm në proceset e mëdha e të vështira që na presin. Formimi i një Qeverie Uniteti, është veprim demokratik, që garanton zgjidhje të çështjeve të theksuara dhe e faktorizon Kosovën në skenën ndërkombëtare , ndërkohë e rritë përgjegjshmërinë e PDK dhe AAK, sforcon partinë fituese VV si dhe LDK dhe si përfundim fuqizon jashtëzakonisht Albin Kurtin si Lider të një Epoke tē Re”, ka shkruar Kuçi  në Facebook-un e tij, përcjell Periskopi.

Kryetari i Junikut thekson se uniteti garanton zgjidhje të çështjeve të theksuara dhe e faktorizon Kosovën në skenën ndërkombëtare pasi që është duke u përballur me presion ndërkombëtar dhe izolim nga BE-ja pas taksës doganore. /Periskopi/