8 orë më parëZvicra iu bën jehonë “Dardanëve”: Duan të ngjiten në majën e Everestit
Periskopi(7 vite më parë)
(7 vite më parë)Tabloidi i njohur zviceran, “Blick”, i ka kushtuar një shkrim special Kosovës dhe shanseve të saj për të qenë finaliste e “Euro 2020”. Indirekt, helvetët duket se duan t’i marrin disa merita në një sukses të tillë hipotetik, duke kujtuar se shumë lojtarë të “Dardanëve” kanë luajtur, ose luajnë në Superligën Zvicerane. Po ashtu, nuk […]
“Kosova në Kampionatin Europian, edhe pse gjendet në një grup me Anglinë dhe Republikën Çeke? Faktikisht, duket e paimagjinueshme. Do të ishte arritje e madhe, me shumë lojtarë helvetë apo ish-lojtarë të Superligës së Zvicrës. Mbi të gjitha, trajneri Bernard Challandes. Skuadra e tij duhet të fitojë sot në Plzen, kundër kombëtares së ish-portierit të Basel, Tomas Vaclik (30 vjeç), i cili tani ruan portën e Sevilla. Sidoqoftë, një fitore sonte nuk është e mjaftueshme për Kosovën. Një tjetër pikë ndaj Anglisë, në kualifikuesen e fundit në shtëpi, do të ishte e nevojshme për kualifikimin. E vështirë, por jo e pamundur.
“Këto dy ndeshje janë për ne si ngjitja në majën e Everestit, – thotë Challandes. – Duhet ta ngjisim këtë mal të lartë brenda katër ditëve dhe pa oksigjen. Të gjithë do të duhet të luajnë ndeshjen e jetës së tyre. Nëse funksionon, do të ishte një mrekulli”. Kosovarët i rritën shanset e tyre për kualifikim në “Euro 2020” me atë fitore në Prishtinë, kundër Çekisë, kur Mërgim Vojvoda mposhti portierin Vaclik, me një sulm “të pabesë” të minutës së 66-të, kur rezultati momental ishte në barazim 1-1. Ish-lojtari i Basel paralajmëron: “Fuqia më e madhe e Kosovës është kohezioni. Ata luajnë me shumë zemër, me shumë pasion. Ju mund ta kuptoni qartë se janë shumë krenarë për vendin e tyre”. Ai gjithashtu vlerëson klasin individual të kundërshtarit: “Hadergjonaj, Kololli dhe Voca, që njoh nga Superliga e Zvicrës, edhe lojtarët e tjerë, kanë shumë potencial. Nuk do të jetë e lehtë për ne”.
Liga e Kombeve si një shans bonus
Nëse kosovarët dështojnë në kualifikueset e rregullta, Liga e Kombeve mbetet një mundësi tjetër për biletën e Kampionatit Europian. Në gjysmëfinalen e marsit, ata do të përballen me Maqedoninë Veriore. Nëse kalon këtë pengesë, në finale do të luajë kundër Gjeorgjisë, ose Bjellorusisë. Se çfarë do të thotë kjo, e tregon “sulmi” para ndeshjes kundër Maqedonisë, rrëfyer nga trajneri Challandes: “13.000 bileta të asaj ndeshjeje u zhdukën për 11 minuta. Kishte mbi 100.000 kërkesa për bileta”. Duket qartë se Kosova po kalon një moment të jashtëzakonshëm futbolli.
