Pas asaj që pamë mbrëmë, krejt çka i duhet Zhegrovës tani është të qëndrojë sa më larg Instagramit

Ylli i Kombëtares kosovare u zëvendësua vonë në pjesën e dytë, por impresionoi për aq minuta sa ishte në fushë, shkruan Periskopi.

Pavarësisht se nuk shënoi ose asistoi, “ëhoscored” i dhuroi atij notën më të lart nga gjithë futbollistët e tjerë në fushë, 8.0.

Të shpallesh “Lojtari i Ndeshjes” pa shënuar ose asistuar do të thotë shumë, por kjo vetëm sa na frustron edhe më tepër.

Kjo nënkupton se ylli prishtinas në ditën e tij është thjesht i pakapshëm dhe një gjë e tillë të bën të hamendësosh pse ai nuk përkushtohet kështu në çdo ndeshje.

Disi, nganjëherë, ai duket se thjesht nuk e ka fokusin e duhur në fushë, përndryshe potenciali i tij është i jashtëzakonshëm.

Andaj, ky është një rast fantastik për të që ta vazhdojë momentumin dhe, kush e di, ndoshta kjo mund të jetë pika e kthimit për të në rrugëtimin hipotetik drejt listës së ngushtë për “Topin e Artë”.

Po, aftësitë e tij janë aq impresive sa ndihemi komod ta themi një gjë të tillë.

Mirëpo, hapi i parë për të është të qëndrojë sa më larg spektakleve në Instagram ku përfshihet muzika, rrobat dhe gjërat e tjera materiale të cilat nuk i bëjnë aspak mirë karrierës së një futbollisti.

Aktiviteti i tij në Instagram është aq i madh, saqë kur bëni një kërkim të thjesht në Google me emrin e tij dhe vitin 2019, opsionet e para janë fotot e tij të postuara në platformën e rrjeteve sociale – fakt i çuditshëm për një futbollist profesionist. /Periskopi.com/