‘Nga një Federatë që drejtohet prej një të dënuari, nuk pritet më mirë’

Jo për herë të parë, faqja “tiks.app” ka rënë tërësisht nga rrjeti në kohën kur duhej të kryhej shitja e biletave online.

Kjo gjë ka nxitur audiencën të besojë se po bëhen dallavere me shitjen e biletave për këtë përballje, siç janë bërë edhe në takimet e tjera të “Dardanëve”, shkruan Periskopi.

Përkundër se kjo gjë po ndodh vazhdimisht, Federata e Futbollit të Kosovës e udhëhequr nga Agim Ademi – i cili është i dënuar me nëntë muaj burg efektiv – nuk ka pasur asnjë përgjigje, madje duke kontribuar në vazhdimin e trendit të parregullsive.

E Ademi është prej atyre figurave që jo rrallëherë e ka gjetur veten pre të situatave të pahijshme për një president të një institucioni tepër prestigjioz. 

Organizata më e madhe e futbollit në vend kishte mbetur në një pozitë tepër të palakmueshme kur kishte thënë se ka biseduar me UEFA-n për çeshtjen e parregullsive në shitjen e biletave, por UEFA ishte kundërpërgjigjur duke thënë se nuk ka marrë asnjë kërkesë apo ankesë nga askush në lidhje me këtë çështje.

E i bindur në parregullsi dhe dallavere brenda Federatës po del të jetë edhe gazetari Përparim Isufi, i cili e ka lënë këtë të nënkuptohet me anë të dy statuseve që i ka postuar së fundmi në Facebook.

“Nga nje federate qe drejtohet prej nje te denuari nuk mundesh me prit ma mire,” shkruan Isufi në statusin e parë.

Statusi i dytë është edhe më interesant, me Isufin që ka postuar një foto të emërtimit të tribunave për shitjen e biletave, me mbishkrimin:

“Nje moment (qe nja 10 minuta)… derisa t’i kontrabandojme krejt.” /Periskopi.com/