Eksperti gjerman: Standardet e ndërtimit janë domosdoshmëri

Sipas tij, një tërmet i fortë ndikon në tendosjen e terrenit në afërsi të lëkundjeve. Aty ku tensionet në tokë rriten, mund të shkaktohen tërmete të tjera, të ashtuquajturat tërmete pasuese. Në përgjithësi në ditët në vijim aktiviteti reduktohet mjaft shpejt, por mund të ndodhë që edhe më vonë aktiviteti të ripërtërihet, sidomos kur tërmetet pasuese janë të forta.

Produktiviteti i paslëkundjeve është i ndryshëm në tërmete të ndryshme, thotë ai, dhe tërmeti në Shqipëri ka shkaktuar një numër të madh tërmetesh pasues për shkak të magnitudës. Për fat të keq, nuk mund të flitet me siguri për asgjë thotë Tilmann, por mundet vetëm të jepen të dhëna statistikore.

Duke folur për ngritjen me 10 cm të nivelit të tokës pranë Durrësit, Tilman thotë se një tërmet, shkakton tkurrje terreni që në këtë rast çon në ngritjen e sipërfaqes së tokës. Në vende të tjera mund të ketë një ulje të lehtë, por në tipe të tilla toke, mbizotëron ngritja e sipërfaqes. Në epoka gjeologjike miliona vjeçare, efektet e mijëra tërmeteve, çojnë në krijimin e maleve, siç janë dinaridet.

Duke marrë shembullin e Japonisë, si vendi më i rrezikuar nga tërmetet, profesori gjerman thotë se vendi mori shumë masa, veçanërisht përcaktoi standarde strikte ndërtimi duke u bërë një nga vendet më të përgatitura në botë përballë tërmeteve. Shqipëria, duke qenë një nga zonat më të rrezikuara në Evropë, duhet të marrë masa që banesat të ndërtohen apo fortifikohen, në mënyrë që të mos shemben nga dridhjet e forta të tokës.