Uebsajti gjigant i sportit vendos Kosovën në mesin e 10 Kombëtareve më atraktive në botë

Gjiganti mediatik, “Bleacher Report” e ka vendosur Kosovën në vendin e nëntë të Kombëtareve më atraktive në botë për t’i shikuar aktualisht.

Uebsajti që ka zyra në Amerikë dhe Londër ka përpiluar një listë të dhjetë Kombëtareve më atraktive për fansat neutralë, të cilët do të kenë kohë të lirë të shikojnë ndeshje gjatë pushimit ndërkombëtar, me klubet dhe reprezentacionet e tyre në pushim, raporton Periskopi.

Pas Algjerisë në të dhjetin, “Bleacher Report” i ka vendosur “Dardanët” në pozitën e nëntë.

Në përshkrimin për Kosovën, uebsajti ka shkruar:

“Arsyeja kyçe: Potenciali për të bërë historinë.

“Një Komb i pavarur që nga viti 2008. I njohur nga FIFA vetëm tre vite më parë. I humbën nëntë nga dhjetë ndeshjet e para pasi futbolli i zuri me intensitet të shpejt dhe fuqishëm.

“Pavarësisht kësaj, Kosova ka treguar një fytyrë tjetër, duke adaptuar një stil të futbollit atraktiv me një grup të mirë të lojtarëve.

“U desh një kundërshtar i kalibrit të Anglisë për t’i dhënë fund ecurisë prej 15 ndeshjeve pa humbje të saj muajin e kaluar, me një humbje triller 5-3.

“Në Milot Rashicën dhe Bersant Celinën, Kosova ka një dyshe kreative në mesfushë, derisa Arbër Zeneli mund të ndihmojë me topa sulmuesin Vedat Muriqi.

“Kualifikimi në ‘Euro 2020’ është i mundshëm nëse arrijnë rezultate të mira në tri ndeshjet e ardhshme, duke filluar kundër Malit të Zi në shtëpi javën e ardhshme. Çfarë suksesi i jashtëzakonshëm do të ishte nëse e arrin.”

Kujtojmë se përveç Kosovës dhe Algjerisë, në listën e “Bleacher Report” janë përfshirë edhe Kombëtarja e Venezuelës, Senegalit, Brazilit, Anglisë, Meksikës, Italisë, Gjermanisë dhe Holandës. /Periskopi.com/