Apostolova takoi Mustafën, i kërkoi rol konstruktiv për dialogun

Shefja e zyrës së Bashkimit Evropian (BE) në Kosovë, Nataliya Apostolova u takua sot me kryetarin e Lidhjes Demokratike të Kosovës (LDK), Isa Mustafa.

Sipas një njoftimi për media të LDK-së, ky takim u mbajt për të diskutuar zhvillimet aktuale në vend.

“Mustafa e njoftoi Apostolova për qëndrimet e LDK-së për proceset në të cilat po kalon Kosova duke përfshirë dialogun Kosovë-Serbi”, thuhet në njoftim.

Ndërsa, Apostolova citohet të ketë inkurajuar LDK-në të vazhdojë të ketë rol konstruktiv në zhvillimin e vazhdueshëm të Kosovës.

Kujtojmë se faktorët ndërkombëtarë si dhe partitë në pushtet janë duke kërkuar nga LDK që të bëhet pjesë e Ekipit të Dialogut të Kosovës, në bisedimet mes Kosovës dhe Serbisë në Bruksel.

Por LDK ka përsëritur edhe sot qëndrimin kundër bashkimit si parti opozitare në Ekipin e Dialogut dhe po vazhdon të kërkojë zgjedhje të parakohshme parlamentare. /Periskopi