Urimi i Pacollit për vizat drejtuar rinisë e cila kërkon shpëtimin jashtë Kosovës

Ai urimin entuziast e shprehu në Facebook menjëherë pasi që Parlamenti Evropian përmbylli votimin për këtë çështje.

“Urime Kosovë, urime e dashura rini e Kosovës. Kaluam edhe sfidën e radhës! Parlamenti Evropian sapo votoi PRO liberalizimit të vizave për qytetarët e Kosovës”, shkroi Pacolli.

Mirëpo, ky urim është komentuar në rrjete sociale ngase është parë si i çuditshëm, marrë parasysh vullnetin e të rinjve për ta lënë Kosovën dhe për të gjetur strehë në shtetet perëndimore.

Vetëm dy ditë më parë nga raporti “Analiza e Pulsit Publik – Sfidat dhe Këndvështrimet e Rinisë në Kosovë”, kuptuam se 60 për qind e qytetarëve e konsiderojnë seriozisht mundësinë e ikjes nga Kosova në tri vjetët e ardhshme.

Urimi i Pacollit drejtuar të rinjve është kuptuar si gëzim i tij që të rinjve më në fund po u hapen dyert dhe të ardhmen e tyre mund ta gjejnë më lehtë diku në shtetet e BE-së, meqenëse Kosova s’mund t’ua ofroj atë që kanë nevojë të rinjtë. E, skandaloz këtë urim e bën fakti se Pacolli është zyrtar i lartë në Qeverinë e Kosovës. /Periskopi/