Si rrodhi e gjithë ngjarja me Vuçiqin protagonist

“Siguria e qytetarëve është mbi të gjitha. Kam tërhequr lejen e dhënë nga Ministria e Punëve të Jashtme për vizitë të Presidentit Serb në zonën e Drenicës. Ky vendim hyn në fuqi menjëherë”, ka shkruar ai, raporton KTV.

Anulimi i kësaj vizite ka ngjallur reagimet të shumta.

Zëdhënësja e përfaqësueses së lartë të BE-së, Federica Mogehrinit, Maja Kocijançiq ka shprehur keqardhje për anulimin e vizitës nga Presidenti i Serbisë në fshatin Banjë.

Bashkimi Evropian ka kërkuar që udhëheqësit shtetërorë ta ruajnë rendin dhe qetësinë.

Kundër bllokimit të rrugëve tha se ishte edhe presidenti Hashim Thaçi.

Ai shkroi në rrjetet sociale se i mirëkupton qytetarët, por sipas tij, në një kohë kur po punohet për paqe mes dy vendeve, protestat nuk ndihmojnë.

“Si President i Kosovës, e mirëkuptoj plotësisht reagimin e qytetarëve të Drenicës, të cilët kanë shprehur revoltën e tyre të arsyeshme kundër një vizite të tillë. Kjo tregon se plagët e dhimbjes dhe luftës janë ende shumë të freskëta. Megjithatë, në kohën kur jemi duke bërë përpjekje për paqe dhe pajtim, protestat dhe bllokimi i rrugëve aspak nuk na ndihmojnë”, ka shkruar Thaçi.

Edhe kryeparlamentari, Kadri Veseli, ka thënë se ishte kundër vizitës së presidentit serb në Kosovë.

Ky tha se presidenti i Serbisë me vizitën e fundit dëshmoi se liderët e Serbisë po e vazhdojnë traditën e Slobodan Millosheviqit.

Deputeti i LDK-së, Lumir Abdixhiku, vendimin e qeverisë e ka cilësuar si turp para vetes e botës për shtetin e Kosovës.

“Presidenti i një vendi armik, pasi ka caktuar kufij të rinj; pasi ka folur për resurset e Kosovës sikur të ishin të tij, është ndaluar – në i thënçin ashtu – e është kthyer jo në Serbi, por në Veri”, ka shkruar Abdixhiku

Ndërkohë, për kryetarin e Vetëvendosjes, Albin Kurti dhënia e lejes për Vuçiqin nga qeveria e Kosovës është bërë në mënyrë të jashtëligjshme.

Visar Ymeri, nga Partia Social-Demokrate, vizitën e presidentit serb e ka quajtur defilim për të demarkuar terrenin e tij të ri.

Reagime për anulimin e vizitës së presidentit serb, në Banjë të Skenderajt, pati edhe nga politikanë serbë, të cilët e kanë quajtur vendim të autoriteteve kukulla të Prishtinës.

Kryeministrja serbe, Ana Brnabiq, tha se ngjarjet në Kosovë tregojnë kompleksitetin dhe ndjeshmërinë e situatës.

Ajo ka thënë se përfaqësuesit e shqiptarëve në Kosovë janë të padurueshëm, të papërgjegjshëm, të paparashikueshëm dhe nuk respektojnë marrëveshjet.

Dështim të qeverisë së Prishtinës dhe një fitore e madhe e Serbisë në aspektin diplomatik e ka quajtur ministri i jashtëm serb, Ivica Daçiq, vizitën e presidentit serb Aleksandër Vuçiq në Kosovë.