Futbollisti nga Drenica për çdo muaj ia dorëzoi pagën një familjeje në nevojë

‘Besi’ gjatë gjithë karrierës së tij ka luajtur për Drenicën duke dhënë kontribut të madh për skuadrën nga qyteti i Skënderajt.

Ai gjithashtu ka kontribuuar për gjatë një viti për një familje në nevojë, duke ia dorëzuar pagën mujore të cilën e fitonte në klub.

Bajraktari për këtë veprim të tij u ka treguar vetëm disa shokëve të tij të ngushtë, por jo edhe bashkëlojtarëve të tij në skuadër.

Bajraktari pas një kohe të gjatë e ka zbuluar një gjë të tillë pas insistimit të Insportit. “Në edicionin 2002-03, një familje nga Drenica ishte në kushte të rënda financiare. Vendosa që pagën të cilën e fitoja në klub, t’ua dorëzoi atyre. Pagën time e kam dorëzuar në shtëpi andaj vendosa që ta ndihmojë atë familje”,nis rrëfimin e tij për Insporti, Besim Bajraktari.

Ndryshe, familja e tij tash e 30-vite merren me një biznes familjar në Komunën e Skënderajt.

E zbuluan shumë pak njerëz

Tutje, ‘Besi’ zbulon se shumë pak njerëz e kanë ditur këtë fakt. “Nëse i ndihmon dikujt, nuk është e nevojshme që të bëhet reklamë. Nuk kam dashur që një gjë të tillë ta dijë askush, e zbuluan vetëm disa shokë të ngushtë”, shtoi Besim Bajraktari, shkruan insport.

Pas një viti, Bajraktari e ndali ndihmën ndaj familjes në nevojë për faktin se kushtet financiare atyre iu përmirësuan. “Disa meshkuj të familjes në fjalë gjetën punë dhe i përmirësuan kushtet ndërkohë që më falënderuan dhe më thanë që tashmë jemi më mirë me financa”.

Ai dhe familja e tij në vazhdimësi i ndihmojnë njerëzit, por që Bajraktari nuk preferon që ta flas më tutje lidhur me këtë temë.

Kush është Besim Bajraktari?

Besim Bajraktari e ka nisur karrierën te skuadra e Drenicës në moshën 16-vjeçare. Ai deri në moshën 35-vjeçare i qëndroi besnik klubit ‘kuq e zi’.

“Jam shumë i lumtur me karrierën time. Në të gjitha qytetet me respektojnë, ata që përcjellin futboll. Pas përfundimit të karrierës, kishe oferta për tu emëruar ndihmës-trajner në ekip, mirëpo ato i kam refuzuar për faktin se jam shumë i angazhuar me biznes familjar. Edhe ashtu më ka humbur dëshira”.

Kurrë më në futboll, është shndërruar në ‘Shqiponjë të Zezë’

Në pyetjen se a synon që një ditë t’i rikthehet futbollit, kësaj radhe jashtë fushës, Bajraktari ishte i shkurtër. “Kurrë nuk do të rikthehem pasi që më ka humbur dëshira”.

Megjithatë, ai nuk mund të largohet totalisht nga futbolli. “Më mirë po ndjehem si tifoz. Vitet e fundit jam shndërruar në Shqiponjë të Zezë (tifozët e Drenicës)”,përfundoi Besim Bajraktari.