Marku premton spektakël: Rivalin serb do ta mposht që në raundin e parë

Sfida do të jetë kundër një kundërshtari me kombësi serbe, Sladan Dragisiç. Ky i fundit ka deklaruar që do të vijë për të befasuar kryeqytetin.

Por, mëngjesin e së martës në “Wake Up”, Floriani premtoi fitore, madje pse jo që në raundin e parë.

“Dëshira ime është për t’i dhuruar spektakël publikut. Shpresoj, meqë edhe serbi ka dhënë një intervistë ku ka premtuar se do të luftojë si burrat, që të bëjmë një ndeshje të bukur dhe unë nga ana ime shpresoj të luftoj vetëm në këmbë.

Pastaj, kush është më i forti do të shohim. Por, nëse ai e bën këtë gabim dhe ndeshet në këmbë me mua, u them shqiptarëve se ndeshja do të përfundojë shumë shpejt. Ka për ta parë veten pa ndjenja”, – është shprehur ndër të tjera Marku.

Edhe pse ndoshta spektakli mund të mos zgjasë, Floriani solli shembullin e Mike Tyson, për ndeshjet e të cilit publiku paguante shumë, por që ai i përfundonte që në raundin e parë.

Një pyetje interesante, për të cilën moderatorët e “Wake Up” kërkuan përgjigje, ishte ajo se, përse kampioni i botës në kick-box nuk e merr asnjëherë në ndeshje mamin dhe motrën…

“Më stresojnë, unë duhet të jem i qetë në ring. Diçka e tillë më ka ndodhur gjatë një dueli në Greqi. Mes 4.000-5.000 vetëve dëgjova vetëm një zë që thërriste emrin tim.

E kuptova që ishte motra ime dhe më shpërqendroi. Nuk e dija që do të ishte aty e prej atëherë i kam lajmëruar të mos vijnë më të më ndjekin”, – deklaroi Florian Marku.