Kush është Mariano Rajoy, kryeministri i shkarkuar spanjoll?

Mariano Rajoy u shkarkua sot nga pozita e kryeministrit të Spanjës, me një mocion mosbesimi të inicuar nga Partia Socialiste, shkruan Periskopi.

Rajoy shërbeu si kryeministër i Spanjës që nga viti 2011, ndërsa më parë kishte shërbyer edhe si ministër dhe lider i opozitës. Mandati i parë si kryeministër ishte përshkuar me krizën e rëndë ekonomike që e kishte kapluar Spanjën, dhe me papunësinë që arriti deri në 27%.

Por, Rajoy bëri një punë të mirë pas zgjedhjeve të vitit 2015, me papunësinë që u ul ndjeshëm dhe me ekonominë që pati dhe ka një rritje të madhe.

Rajoy është rritur në krahinën e quajtur Galicia në veri të Spanjës. Ai ka studiuar juridikun në Universitetin e Santiago de Compostelas, në të cilin diplomoi në vitin 1878. Karrierës së tij në politikë ai i kishte hyrë në moshën 26 vjeçare, ndërkohë që tash ai ka 63.

Ai ka qenë ministër i administratës publike, i arsimit dhe kulturës, ministër i brendshëm, dhe më 2003, ai e mori lidershipin e partisë. Rajoy si lider i partisë dështoi që të fitonte zgjedhjet, dhe mbeti për kohë të gjatë si lider opozite.

Rajoy është një konservator spanjoll, që i takon fesë katolike romane, dhe ka shprehur bindje kundërshtuese ndaj të drejtës së abortit dhe martesave të seksit të njëjtë.

Rajoy ka shprehur bindje se duhet lejuar emigrantët në Spanjë, dhe se do t’i ofrohej azil atyre. Ai madje e kishte kritikuar qeverinë hungareze e cila i kishte dëbuar emigrantët nga vendi i saj.

Rajoy ishte mbështetës i fortë i luftës me dema, duke thënë se ishte një traditë që kishte rrënjë të thella në historinë spanjolle. /Periskopi