Tërnava nuk flet për ndërtimin e xhamisë qendrore në Prishtinë

Një ditë para fillimit të muajit të shenjtë për të gjithë besimtarët mysliman, Myftiu i Bashkësisë Islame të Kosovës, Naim Tërnava, nuk ka pranuar të flasë për Xhaminë Qendrore.

“Nuk dua të flas tani por një ditë tjetër. Xhamia do të bëhet shpejt me ndihmën e Zotit” ka deklaruar ai.

Përndryshe Bashkësia Islame e Kosovës, sot ka mbajtur një konferencë për media ku ka uruar myslimanët për muajin e shenjtë të Ramazanit.

“Duke treguar edhe vlerën dhe rëndësinë e agjërimit, dhe obligimin e agjërimit, ne duhet të dëshmojmë edhe durim e dituri në këto ditë. Manifestimi i agjërimit duke abstenuar nga ushqimi e pija është pastërti për trupin por edhe paraqet solidarizimin me shtresat tjera të shoqërisë”, është shprehur Tërnava.

Ai ka uruar të gjithë besimtarët për fillimin e këtij muaji, duke thënë se agjërimi është i urdhëruar për t’u mbrojtur nga të këqijat.

“Ndonëse formalisht manifestohet duke abstenuar nga ushqimet dhe pijet, në esencë agjërimi është një kurs edukativ, i cili përgjatë një muaji të tërë në mënyrë intensive punon për të formësuar në mënyrë të përsosur personalitetin e besimtarit dhe lidhjet e tij me zotin dhe të tjerët. Duke na kujtuar për objektivën kryesore që ka agjërimi, Zoti i madhëruar në Kuranin fisnik thotë; O besimtarë ju është urdhëruar agjërimi, ashtu si u ishte urdhëruar atyre para jush, që të mund të ruheni nga të këqijat, mbaron citati”, ka thënë Tërnava, përcjell KosovaPress.

Myftiu Tërnava tutje ka thënë se largimi nga ushqimi ose pijet është mjet ose mënyrë për të arritur te qëllimi, që është devotshmëria.

“Agjërimi është shkollë humanizmi. Vlerat solidare agjërimin e bëjnë një mundësi më shumë për të zbutur varfërinë dhe për të lidhur pjesëtarët e shoqërisë ndërmjet vete. Mënyra se si arrihet kjo në Ramazan është e rrallë, ose është karakteristikë veç e Ramazanit. Manifestimi i agjërimit duke abstenuar nga ushqimi dhe pija, sipas disa dijetarëve myslimanë është bërë për t’ja kujtuar të pasurit shijen e hidhur të urisë, që të varfërit e kanë përditshmëri, pra është edukim praktik, vetëdijesim konkret dhe jo vetëm”, ka vazhduar ai.

Tërnava ka thënë se agjërimi synon krijimin e një klime të dashurisë, respektit dhe gëzimit, ku i varfëri dhe i pasuri takohen dhe nuk e harrojnë njëri-tjetrin.

Ramazani fillon nesër, më 16 maj, dhe përfundon më 14 qershor. Dita e parë e Fitër Bajramit është më 15 qershor.