Zyrtare: Ky do të jetë trajneri i Kombëtares së Kosovës në futboll (Foto)

Pritjes së gjatë i ka ardhur fundit, sepse më 2 mars Kosova do të emërojë trajnerin i ri. Emri ende nuk është zyrtarizuar nga FFK, por mësohet se do të jetë zvicerani 66 vjeçar, Bernard Challandes.

Sekretari i Federatës së Futbollit të Kosovës, Eroll Salihu, e konfirmoi për Supersport që emri i trajnerit të ri do të publikohet në kuvendin e ardhshëm të FFK-së, që mbahet më 2 mars.

Sipas tij, me pasardhësin e Albert Bunjakut është arritur parakontratë, ndërsa zyrtarizimi do të bëhet pasi të vendosë Komiteti Ekzekutiv. Salihu nuk pranoi të bëjë të ditur emrin e trajnerit, por tha se është zviceran.

Sipas të gjitha gjasave, përzgjedhës i Kosovës do të jetë Bernard Challandes. 66-vjeçari zviceran aktualisht punon si “scout” tek ekipi Baselit, ndërsa më parë ka qenë përzgjedhës i Armenisë, nga e cila kishte dhënë dorëheqje në mars të vitit 2015, vetëm një ditë pasi ishte mposhtur nga Shqipëria në ciklin kualifikues të “Euro 2016”.

Challandes është menaxher në kompaninë e Footuro, që menaxhon 45 futbollistë, në mesin e tyre 12 shqiptarë, pjesë e të cilëve është edhe mesfushori i kombëtares shqiptare, Migjen Basha