Pas lirimit nga paraburgimi, flet deputeti Frashër Krasniqi

Pas vendimit të Gjykatës së Apelit që të lirojë nga paraburgimi aktivistët e Lëvizjes Vetëvendosje të cilët u dënuan nga Gjykata Themelore e Prishtinës për rastin e sulmit ndaj objektit të Kuvendit, ka reaguar deputeti VV-së, Frashër Krasniqi, i cili është njëri prej të liruarve

Krasniqi thotë se ata u liruan sot për një vepër që nuk e kishin kryer, dhe thotë se ky rast do të mbetet turpi i sistemit të drejtësisë në vend.

Reagimi i plotë:

Gjykata e Apelit na liroi nga burgu ku po vuanim dënimin për një vepër që nuk e kishim kryer.

Çka do të thotë sot dhe nesër Beqir Kalludra dhe Klani Pronto që e porositen të na dënojnë?

Çka do t’i thonë familjes Dehari që ua kthyen djalin në arkivol?

Çka do t’i thonë nesër Arsës së vogël kur ajo të pyet për babain e saj?

Çka do t’ju thonë nënave tona që për 3 muaj vuajtën duke pritur djemt e tyre pa shpresën që do t’i shohin me vite të tëra?

Çka do t’iu thonë qytetarëve të Kosovës që ua kanë humbur cdo shpresë që mund të ketë drejtësi në këtë vend?

Rasti i montuar ndaj nesh do të mbetet në histori si turpi i sistemit të drejtësisë në këtë vend. E ata që e mbuluan vendin tonë me turp, shumë shpejt do të ndjeken nga drejtësia dhe do të përfundojnë prapa grilave.