Arsyeja e formës së mirë dhe shënimit të shpeshtë të golave – flet Xherdan Shaqiri

Mesfushori kosovar i Zvicrës, i cili shënoi në ndeshjen e fundit ndaj Leicester Cityt, ka folur për formën e tij të mirë dhe trajnerin e ri gjatë një interviste për Sky Sports.

Shaqiri, që ka rigjetur formën e tij të jetës në kampionatin anglez nën drejtimin e trajnerit të ri, Paul Lambert, ka thënë se trajneri ka një pjesë të meritave për formën e mirë të tij.

Futbollisti 26-vjeçar, tha se përkundër vështirësive në të cilat po kalon Stoke, beson që forma individuale e tij është më e mira që ai ka pasur deri tani me fanellën e klubit anglez.

“Nuk është sezoni më i mirë për Stoke, por si lojtar ju tentoni të bëni më të mirën për të dhuruar paraqitje të mira”, tha Shaqiri.

“Personalisht, ky ka qenë sezoni më i mirë për mua dhe jam i kënaqur me paraqitjet këtë edicion. Por, nuk jam i kënaqur me atë se si po shkon sezoni për ekipin”, shtoi kosovari.

Dallimet e Premierligës me Bundesligën dhe Serie A

Sipas Shaqirit, dallimet në mes të kampionatit anglez, dhe atyre gjerman dhe italian [ku ai është aktivizuar te Bayern Munchen, respektivisht Interi], është i madh.

“Kjo ligë është ndryshe nga Italia dhe Gjermania – ju duhet të adaptoheni”, tha Shaqiri.

“Është viti im i tretë, dhe mund të them se ‘tani jam këtu’, dhe se kam bërë shumë mirë. Në Premeirligë ju nevojitet kohë – jam shumë i lumtur me paraqitjet e mija por sekip duhet të bëjmë më mirë”, vazhdoi ai.

Me tri humbje në 6 ndeshjet e fundit, Stoke aktualisht renditet e 19-ta në Premierligë, ndërkaq në takimin e fundit barazoi në udhëtim me Leicesterin.

Por Lambert, që zëvendësoi Mark Hughes muajin e kaluar, ka pasur ndikim pozitiv në skuadër, sipas Shaqirit.

Ai ka ndikuar edhe në formën e mirë në të cilën po kalon Shaqiri, ndërkaq më herët këtë muaj kishte thurur lavde për kosovarin.

Shaqiri gjithashtu ka zbuluar sekretet e trajnerit të ri, që sipas kosovarit, ka ndihmuar që të ngris atmosferën dhe shpirtin e ekipit, në luftën për mbijetesë në Premierligë.

Që prej kur mori drejtimin e ekipit, Paul Lambert ka rritur intensitetin e seancave stërvitore dhe ka tentuar të bashkojë ekipin duke bërë që lojtarët të drekojnë dhe darkojnë së bashku, pa praninë e telefonëve mobil.

Shaqiri mendon se ky lloj i menaxhimit është i ndikuar nga përvojat e Lambert që ai kishte pasur gjatë punës së tij në Gjermani.

“Ai ka mentalitet gjermani me ekipet e tij, jam shumë i lumtur që ai erdhi këtu”, tha Shaqiri në intervistën me Sky Sports.

“Në ekipet gjermane ata gjithmonë hanë së bashku – nuk ka telefona në tavolinë. Kjo na ka bashkuar – kur hani së bashku ju mund të flisni me shokët ekipit me të cilët normalisht ju nuk filsni shumë. Është gjë e mirë.

“Ju dënoheni nëse merrni telefonin tuaj në darkë! Duhet të respektoni rregullat. Çdokush e respekton këtë – ekipi është më kompakt tani. Kjo është e rëndësishme për një ekip që tani ka nevojë për këtë. Jemi me vetëbesim dhe të lumtur”, e përfundon intervistën e tij Shaqiri.

Shaqiri do të ketë mundësinë të arrijë rekordin 50-vjeçar në Premierligë këtë të shtunë, në ndeshjen që Stoke e zhvillon kundër Southamptonit.