Mërgim Mavraj flet për shortin e Shqipërisë dhe Kosovës

Ai mendon se kuqezinjtë duhet të jenë të kujdesshëm ndaj Islandës dhe Turqisë, ndërsa beson se Kosova mund të marrë ndonjë rezultat pozitiv për shkak të formës së mirë.

Përveç, Anglisë, ndër kombëtaret më të forta të mundshme që Kosova ka mundur t’i ketë, këto janë tri kombëtaret tjera, mbase më të lehta në letër, në grupin e “Dardanëve” – Çekia, Bullgaria dhe Mali i Zi.

Ndërsa, Shqipëria po ashtu do të ndeshet me një ndër kombëtaret në formën më të mirë, Francën, si dhe me katër kombëtare të tjera, të cilat janë më të dobëta, Islanda, Turqia, Moldavia, Andorra.

Sa shanse ka Shqipëria?

Për mundësi dhe shanse është e vështirë të flasim tani. Kemi pasur ndeshje të mira me Francën dhe Turqinë. Me këtë grup, e dimë që Islanda ka ecur shumë përpara, është e fortë. Islandën dhe Turqinë i kemi kundërshtarë kryesorë. Nëse ia dalim në këto ndeshje, kemi shumë mundësi.

Mendon se kemi gjasa me Turqinë dhe Islandën, kë shikon skuadër më të vështirë?

Islanda është më e vështirë për të luajtur, është një ekip që kurrë nuk e anashkalon kundërshtarin. E përgatit ndeshjen në mënyrë maksimale, dhe luftojnë në çdo ndeshje. Është më e vështirë kundër tyre, dhe kanë fituar shumë vetëbesim. Kurse Turqia është ende në ndërtim, kanë ndërruar trajnerin. Islanda është pak më e fortë se Turqia, por të dyja janë të vështira.

Grupi i Kosovës, derbi me Bullgarinë dhe Malin e Zi…

Është e vështirë të flasësh për skuadra të tjera që nuk e njeh mirë, por me Malin e Zi dhe Anglinë, për kosovarët do jenë një ndeshje e jashtëzakonshme. Me këtë formë që kanë momentalisht, mendoj se mund të arrijnë ndonjë rezultat pozitiv.