Verë në vjeshtë, kosovarët kthehen sërish në plazhe

Plazhi ka përfunduar vetëm zyrtarisht, pasi ditët me temperatura të larta kanë bërë që të jenë të shumtë ata që i rikthehen detit edhe në këto ditë vjeshte.

Temperaturat e ngrohta të kësaj fundjave tetori i kanë ftuar pushuesit sërish drejt plazheve të Adriatikut. Disa për të shijuar banjot e diellit e të ujit e të tjerë për shëtitje, lojëra të ndryshme apo dhe një kafe, apo drekë buzë detit.

Të ardhur kryesisht nga Tirana, Elbasani apo dhe vendet e rajonit, Kosova e Maqedonia, frekuentuesit e plazhit i gëzohen rrezeve diellit të ngrohta dhe ajrit të jodizuar edhe këtë fundjavë vjeshte.

Për të gjithë ata që kërkojnë qetësi, më shumë hapësirë, ujë dhe rërë të pastër, si dhe shërbime me çmime më të lira, vjeshta me temperaturat e saj të ngrohta mbetet stina ideale për të pushuar.