Kurti: Thaçi jo vetëm që nuk është president, por nuk është as i Kosovës

Lideri i Lëvizjes Vetëvendosje, Albin Kurti ka folur lidhur me zhvillimet e fundit në Kosovë.

Kurti ka thënë se nga premtimet brenda vendit si kryeministër, Hashim Thaçi ka kaluar te premtimet nga jashtë vendit si president.

Sipas Kurtit ky nuk është Presidenti i Kosovës, por ambasador i vetëshpalluri ne emër të instancave të të cilave premton.

“A thua e bën falas këtë punë ambasadori i vetëshpallur për shtetet që s’na kanë njohur? Nuk e di sa kush tjetër e paguan, por populli i Kosovës shumë shtrenjtë”, ka thënë ndër të tjerash Kurti.

Postimi i plotë:

Ambasadori i vetëshpallur i shteteve mosnjohëse

Nga premtimet brenda vendit si kryeministër, Thaçi ka kaluar te premtimet nga jashtë vendit si president. Dikur si kryeministër premtonte prej 200 mijë vendeve të punës në Kosovë e deri te formimi i komunave Kodra e Trimave, Has, Kievë, Hogosht e Zhegër. Sot si president premton bashkangjitje të Luginës dhe anëtarësim të Kosovës në OKB, NATO e BE.

Presidenti Thaçi po premton në emër të Presidentit Vuçiq se do të na bashkangjiten Presheva, Medvegja e Bujanoci; në emër të Presidentëve Putin dhe Xi se Kosova do të marrë ulëse në OKB; dhe, në emër të Spanjës, Sllovakisë, Rumanisë, Greqisë e Qipros se do të anëtarësohemi në NATO e BE.

Ky nuk është President i Kosovës por ambasador i vetëshpallur i këtyre instancave në emër të të cilave premton. Pra, Presidenti i Kosovës jo vetëm që nuk është President, por nuk është as i Kosovës. A thua e bën falas këtë punë ambasadori i vetëshpallur për shtetet që s’na kanë njohur? Nuk e di sa kush tjetër e paguan, por populli i Kosovës shumë shtrenjtë.

Thaçi s’e ka për shtet tonin që u garanton liri qytetarëve, por për pushtet të vetin e që është e vetmja garanci e lirisë për të.