Reshitaj kërkon transport falas për qytetarët e Prishtinës që të redukohet përdorimi i veturave

Ministrja e Mjedisit, Albena Reshitaj ka kërkuar fuqizimin e një serie masash si përpjekje për të ‘zbutur’ gjendjen e keqe të ajrit në Prishtinë.

“Ne si ministri kemi kërkuar angazhimin e dikasterve përgjegjës për këtë çështje andaj kërkoj nga qeveria të na përkrah në implementimin e planit të hartuar kohë më parë. Kërkoj që nga takimi i sotëm i qeverisë të dalim me krijimin e një Task – Force ndërministrore për të marrë masa të veçanta dhe për të implementuar udhëzimet administrative që kemi në fuqi”, ka thënë Reshitaj në mbledhjen e Qeverisë, shkruan Periskopi.

Ajo ka kërkuar nga Qeveria e Kosovës, që t’ia sigurojë ministrisë një shumë parash, përmes të cilave do t’u mundësohej qytetarëve të Prishtinës transporti publik falas, derisa vazhdon të jetë cilësia e keqe e ajrit në kryeqytet.

“Kërkoj nga ju që për këtë periudhë të shqyrtojmë përkrahjen tuaj për të mundësuar transportin publik për qytetarët e Prishtinës në kohë reale për periudha të caktuara derisa niveli i ndotjes të ajrit të kalojë masa”, ka thënë Reshitaj, shkruan Periskopi.

“Jemi në koordinim me komunën e Prishtinës që të bëjmë reduktimin  e qarkullimit të automjeteve në pjesët e Prishtinës kur niveli i ndotjes është më i lartë. Kërkoj nga Ministria e Arsimit që të merr vendim për ndërprerjen e përdorimit të thëngjillit në të gjitha shkollat e Republikës së Kosovës”, ka thënë ajo./Periskopi/