16 minuta më parëHaradinaj i jep fund ëndrrës së prokurorëve dhe gjyqtarëve për paga më të larta
Periskopi(8 vite më parë)
(8 vite më parë)Opinioni i Agjencisë Kundër Korrupsionit, me të cilin të hënën e shpalli të jashtëligjshëm vendimin e Kryeministrit të Kosovës Ramush Haradinajt për rritjen e pagave vetes dhe vartësve të tij, ka bërë që ai vetë ta pezullojë vendimin që e mori në dhjetor, deri në një vendim të gjykatës Kushtetuese për këtë çështje. Ky vendim […]
Opinioni i Agjencisë Kundër Korrupsionit, me të cilin të hënën e shpalli të jashtëligjshëm vendimin e Kryeministrit të Kosovës Ramush Haradinajt për rritjen e pagave vetes dhe vartësve të tij, ka bërë që ai vetë ta pezullojë vendimin që e mori në dhjetor, deri në një vendim të gjykatës Kushtetuese për këtë çështje. Ky vendim i kryeministrit do të vlejë edhe për punonjësit e sistemit të drejtësisë në Kosovë, të cilëve duhej t’u rriten pagat automatikisht me rritjen që bëri kryeministri për vetën dhe vartësit e tij.
Sot pagat për të parin e Qeverisë, zëvendëskryeministrave, ministrave, zëvendësministrave e këshilltarëve të tyre kanë dal pa rritje. Kjo pasi vendimin që e mori me 20 dhjetor e pezulloi vetë kryeministri deri në një vendim të Gjykatës Kushtetuese, e cila do të shqyrtoj kërkesën e nënshkruar nga 30 deputetë të Kuvendit të Kosovës për vlerësimin e kushtetutshmërisë së vendimit për nivelizim të pagave.
E paga të dyfishuara nuk do të marrin as punonjësit e sistemit gjyqësor dhe prokurorial.
Punonjësit e këtij sektori, gjyqtarë e prokurorë kosovarë iu gëzuan lajmit për rritjen e pagave të funksionarëve të lartë publikë pasi kjo rritje automatikisht sillte rritje edhe për tek pagat e tyre. Kështu të paktën e parashihte Ligji për Gjykata dhe ai i Prokurorisë, që varësisht nga pozicioni i zyrtarit, pagat e tyre janë ekuivalente me pagën e funksionarëve publikë. Edhe vetë Ministri i Drejtësisë, Abelard Tahiri u kishte thënë atyre se me këtë rritje ata do të bëheshin me pagat më të mira në rajon.
Zëdhënësja për Informim e Këshillit Gjyqësor të Kosovës, Ajshe Qorraj, ka thënë për Gazetën Express se ky institucion ende nuk kanë marrë ndonjë njoftim zyrtar nëse vendimi për pezullimin e këtij vendimi do të vlej edhe për sistemin gjyqësor dhe prokurorial.
“Ende nuk kemi marr njoftim zyrtar, andaj, nuk kemi informacione se a do te vlej ky vendim edhe për sistemin gjyqësor dhe prokurorial”, thuhet në përgjigjet e zëdhënëses për informim të KGJK-së.
Ajo ka konfirmuar se këta punonjës nuk i kanë marrë pagat me rritje as muajin e kaluar.
“Pagat e muajit të kaluar janë marrë pa rritje”, është përgjigjur ajo.
Ndryshe, nëse do të ndodhte kjo rritje atëherë prokurorët e gjyqtarët do të paguheshin nga 1400 deri në 3 mijë euro. Paga më e lartë do t’i takonte Kryetarit të Gjykatës Supreme, që do të duhej të ishte ekuivalente me atë të Kryeministrit të Republikës së Kosovës, 2950 euro. Paga e Gjyqtarëve të Gjykatës Supreme do të ishte ekuivalente me atë të një ministri në Qeveri, e cila i bie të jetë 2000 euro.
Edhe Kryetari i Gjykatës së Apelit do të pranonte një pagë ekuivalente me atë të gjyqtarëve të Gjykatës Supreme të Kosovës, pra ekuivalent me një pagë të ministrit, 2 mijë euro. E Kryetari i Gjykatës Themelore do të pranonte një pagë ekuivalente me atë të gjyqtarit të Gjykatës së Apelit.
