Rexhep Selimi beson se Haradinaj do ta shkarkojë Nenad Rikalon

Gjatë ditës së djeshme, qytetarë të lagjes Dardania të Prishtinës kanë deklaruar para kamerave se e kujtojnë ministrin e bujqësisë, Nenad Rikalo, si një torturues gjatë kohës së luftës.

Sipas tyre, ai sillej gjithmonë me uniformë dhe i armatosur.

Ndërkaq, gjatë ditës së sotme kryeministri i vendit, Ramush Haradinaj, ka deklaruar se nuk do e shkarkojë ministrin. Kjo për shkak se mungojnë prova nga prokuroria.

Indeksonline ka kontaktuar me deputetin e Vetëvendosjes, Rexhep Selimin, për të parë si e komenton ai veprimin e Haradinajt, për të mbajtur në qeveri një ministër të tillë.

Selimi u shpreh i bindur që kryeministri  Haradinaj do e shkarkojë ministrin Rikallon.
Sipas tij, Haradinaj nuk mund ta durojë dikë që ka terrorizuar qytetarët e Kosovës me armë në fyt, të jetë në një tavolinë me të.

“Unë ende besoj se Z.Haradinaj do ta shkarkojë Rikallon. Madje besoj se vete Z. Haradinaj do te kërkojë nga drejtësia arrestimin e atij krimineli. Duke e njohur Haradinajn unë e di se ai nuk mund ta duroje dike ne tavolinën e tij i cili i ka terrorizuar shqiptaret me arme ne fyt. Prandaj besoj se ai ministër nuk do te shkojë më në mbledhjen e qeverisë, sepse ai ose do te japë dorëheqje ose duhet te shkarkohet”, tha Selimi.

Rexhep Selimi dhe Ramush Haradinaj ndonëse në parti të ndryshme, gjatë kohës së luftës të dy i kanë shërbyer Kosovës në luftën kundër Serbisë.