‘Procesi i ratifikimit të marrëveshjes së demarkacionit duhet të vazhdojë’

Kështu ka thënë, në një përgjigje për Gazetën Observer, zëdhënësja e Komisionit Evropian, Maja Kocijancic  e cila  ka përmendur procesin e liberalizimi i  vizave  si çështje tejet të rëndësishme për popullin e Kosovës, dhe pret që sa më shpejtë të përmbushen kriteret për të.

Në vazhdë të kësaj, Kocijancic ka potencuar që Komisioni Evropian pret vazhdimësinë e procesit të ratifikimit të marrëveshjes së Demarkacionit me Malin e Zi .

“Pas krijimit të Qeverisë së re, Komisioni Evropian shpreson në përmbushjen e kritereve të pazgjidhura deri tani, që kanë të bëjnë me ndjekjen  e rasteve të krimit të organizuar dhe korrupsionit në nivelet më të larta si dhe ratifikimin e marrëveshjes kufitare me Malin e Zi. Këto procese duhet të vazhdojnë”, ka thënë zëdhënësja e Komisionit Evropian Maja Kocijancic

Kryeministri Haradinaj në mbledhjen e parë të kabinetit të qeverisë së tij, ka shkarkuar kryesuesin e Komisionit Shtetëror  për Demarkacionin me Malin e Zi, Murat Mehën , duke e zëvendësuar atë me Shpejtim Bulliqin.

Përgjatë kohës sa ishte në opozitë në legjislaturën e kaluar, Hardinaj ka qenë një nga kundërshtarët më zëshëm të ratifikimit të  Demarkacionit me Malin e Zi, ndërsa Bulliqi ishte njëri ndër ekspertët që në vazhdimësi paraqiste dokumente për të argumentuar gabimet  e bëra nga komisioni i mëparshëm. gjatë gjithë kohës ka insistuar se marrëveshja duhet të ndryshohet.

Pala malazeze e ka ratifikuar në Kuvend  marrëveshjen e arritur për demarkimin e kufirit Kosovë-Mali i Zi, ndërsa pret që e njëjta gjë të bëhet edhe nga pala kosovare, për t’i dhënë fund një procesi të rëndësishëm për të dyja shtetet.