Adem Mikullovci tregon pse nuk do të mbahet sot seanca konstituive

Deputeti më i vjetër i Kuvendit të Kosovës nga radhët e Lëvizjes Vetëvendosje, Adem Mikullovci, në një prononcim për Periskopin ka thënë se mbajtja e seancës konstituive të Kuvendit të Kosovës nuk mund të caktohet pa marrë konfirmim zyrtar nga koalicioni PAN se tashmë janë siguruar numrat e nevojshëm për kandidatin e tyre për kryetar Kuvendi.

“Koalicioni PAN duhet ta njoftojë administratën e Kuvendit se janë të gatshëm për mbledhje. Administrata më thotë mu, atëherë unë e caktoj menjëherë mbledhjen. Pa e marrë konfirmimin zyrtar, mbledhja nuk caktohet. Duhet të shkojnë në Kuvend, meqë në pyetje është zgjedhja e kryetarit të Kuvendit. Sapo fola me sekretarin e Kuvendit, nuk kanë lajmëruar ende asgjë”, ka thënë Mikullovci për Periskopin.

Ndonëse Mikullovci konfirmoi se seanca konstituive nuk do të mbahet sot, nuk u përjashtua mundësia që një e tillë të mbahet nesër.

Koalicioni PAN tashmë ka nënshkruar marrëveshje edhe me partinë e familjes së Behgjet Pacollit, Aleanca Kosova e Re, e cila ka katër deputetë. Kështu, ky koalicion tashmë ka siguruar numrat e nevojshëm për votimin e kandidatit për kryetar Kuvendi dhe të parin e Qeverisë.

Kandidat për kryetar Kuvendi nga koalicioni PAN do të jetë kryetari i PDK’së, Kadri Veseli, ndërsa Ramush Haradinajn nga Aleanca për Ardhmërinë e Kosovës do të synojnë postin e kryeministrit.

Ndryshe, AKR përfitoi pesë ministri, një zëvendëskryeministër dhe shtatë zv/ministra nga marrëveshja që bëri me PAN’in./Periskopi