Dy personat që Vetëvendosje i fajëson për dënimin e aktivistëve

Frashër Krasniqi me 8 vjet, Atdhe Arifi është dënuar me 6 vjet burgim, Egzon Haliti me 5 vjet e gjysmë ndërsa Adea Batusha me 2 vjet burgim.

Për këtë vendim deputeti i Vetëvendosjes Glauk Konjufca, thotë se do të ankohen në Gjykatën e Apelit.

“Vetëvendosja do t’i drejtohet edhe Gjykatës së Apelit”, ka thënë Konjufca në Info Magazine të Klan Kosovës.

“Apeli e merr parasysh vlefshmërinë e provave – besoj se Apeli do ta rrëzojë këtë vendim skandaloz dhe të pa mbështetur në asnjë provë. Jam i bindur që Apeli nuk do ta gjejë  asnjë provë që lidhet më rastin”, tha ai.

Konjufca ka thënë se ky vendim është i qëllimshëm.

“Pse vetëm dy ditë para balotazhit, normalisht që të dëmtohet Vetëvendosja. Por do të dalim edhe më e fort pas këtyre rasteve, sepse jemi mësuar me burgosje, vrasje dhe persekutim. Ky pushtet që është i mbështetur në krim dhe korrupsion e lufton Lëvizjen Vetëvendosje për ta shkatërruar”, tha ai.

Konjufca, ka akuzuar kryeministrin e atëhershëm Isa Mustafën dhe kryeparlamentarin e atëhershëm Kadri Veselin se e kishin shpikur dhe montuar një rast për ta goditur Lëvizjen Vetëvendosje.

Konjuca këto i tha pas vendimit të Gjykatës Themelore për t’i dënuar katër aktivistë të Lëvizjes Vetëvendosje për sulmin në Kuvend.

”Mendoj që nuk duhet ta harrojmë kurrë kontekstin”, tha Konjufca, duke shtuar se “konteksti ishin protestat e mëdha gjithë popullore ku opozita u bë bashkë me popullin kundër asociacionit dhe demarkacionit”.

Sipas Konjufcës, kjo është në zhargonin e boksit “një goditje nën brez”, apo e paligjshme.

“Kjo është për ta hequr qafe Lëvizjen Vetëvendosje nga skena politike”, tha ai.