Limaj është ftuar në darkë, por nuk ka shkuar

Sonte zëvendëskryeministri i parë i Kosovës, Behgjet Pacolli ka qenë nikoqir i një darke, ku të ftuar kanë qenë kryeministri, ministrat dhe zëvendësministrat e Qeverisë Haradinaj.

Periskopi deri tani ka arritur ta konfirmojë takimin e të sipërpërmendurve në shtëpinë e multimilionerit Pacolli. Anëtari i kabinetit qeveritar, Avni Arifi i ka thënë portalit se takimi është “informal”.

Por, në këtë takim nuk ka marrë pjesë zëvendëskryeministri Fatmir Limaj dhe askush nga kabineti dhe partia e tij.

Kështu thonë për Periskopin burime brenda Nismës për Kosovën, përderisa mbetet ende e paqartë arsyeja e mospjesëmarrjes në takim.

Megjithatë, ky burim tha se Limaj dhe ekipi i tij kanë pasur ftesë për darkë.

Periskopi kontaktoi edhe me deputetin e Nismës, Bilall Sherifi. Ai tha se për darkën në shtëpinë e Pacollit është informuar nga portalet, duke shtuar se nuk ka ndonjë informacion konkret.

Takimi po mbahet vetëm një ditë para se çështja e demarkacionit të procedohet në Kryesi të Kuvendit, çka shihet si formë presioni për ta bindur Haradinaj që të ndryshojë qëndrim mbi këtë çështje

Në takim kanë marrë pjesë edhe Presidenti Hashim Thaçi dhe kryetari i Kuvendit Kadri Veseli. /Periskopi/