Darka te Pacolli – A po i bëhet presion Haradinajt që të ndërrojë qëndrim për demarkacionin

Periskopi deri tani ka arritur ta konfirmojë takimin e të sipërpërmendurve në shtëpinë e multimilionerit Pacolli. Anëtari i kabinetit qeveritar, Avni Arifi i ka thënë portalit se takimi është “informal”.

“Po do të jetë një darkë informale. Janë të ftuar kryeministri dhe stafi i tij, ministrat dhe zëvendësministrat. Nuk do të jenë këshilltarët. Para një muaji të gjithë këta kanë qenë të ftuar të kryeministrit”, tha Arifi.

Kjo darkë në shtëpinë e Pacollit vjen vetëm një ditë para se Marrëveshja për demarkacionin me Malin e Zi të procedohet në Kryesinë e Kuvendit të Kosovës.

Mediat tjera kanë raportuar po ashtu se në këtë darkë do të jenë edhe Presidenti Hashim Thaçi dhe Kryetari i Kuvendit, Kadri Veseli, megjithëse informacioni mbetet i pakonfirmuar ende.

Haradinajt deri tash i është bërë presion i vazhdueshëm për ta mbështetur versionin e Murat Mehës për demarkacionin kufitar me Malin e Zi, por ai dhe partia e tij nuk kanë gjetur gatishmëri, për shkak të bindjeve se me këtë marrëveshje Kosova humb territor.

Darka, që Arifaj tha se është e karakterit joformal, mund të jetë një tjetër përpjekje e Thaçit, Veselit dhe Pacollit për ta bindur Haradinajn që të ndërrojë qëndrim.

Sot, gjatë ditës, ishte deputeti i AKR-së Labinot Tahiri ai që i bëri thirrje publike Haradinajt që të ndërrojë qëndrim mbi këtë çështje.

“Ju lutem Kryeministër, të theni mendjen në këto rrethana lidhur me Demarkacionin, dhe të mendoni pozitivisht dhe ta aprovoni (ta ratifikoojmë). Ne deputetët dhe deputetët tuaj, ta përmbyllim këtë serial i cili e ka lodhur popullin tonë, pra ta perfundojmë demarkacionin”, shkroi Tahiri më herët në Facebook. /Periskopi/