Zjarri përfshin pyllin në jug të Parisit, ndërsa vala vdekjeprurëse e të nxehtit përhapet në gjithë Europën

Më shumë se 800 hektarë të pyllit Fontainebleau janë djegur, raportoi të hënën partneri i CNN-it, BFMTV, ndërsa avionët zjarrfikës kanë marrë ujë nga lumi Sena në kuadër të përpjekjeve për ta vënë zjarrin nën kontroll.

Ministri i Brendshëm i Francës, Laurent Nunez, u tha gazetarëve se policia po heton nëse zjarri është shkaktuar qëllimisht. Zjarre pyjore kanë shpërthyer edhe në pjesë të tjera të vendit, tha Nunez në një postim në X të dielën.

Zjarret pyjore nuk janë të pazakonta në Europë, por kriza klimatike po sjell mot më të nxehtë dhe më të thatë, duke krijuar kushtet për sezone zjarresh më të ashpra. Ato po ndodhin gjithashtu më herët gjatë vitit dhe me intensitet gjithnjë e më të madh.

Në pjesën më të madhe të Francës dhe Spanjës, një dimër jashtëzakonisht i lagësht la shumë bimësi, e cila u kthye shpejt në lëndë lehtësisht të djegshme, ndërsa tri valë të njëpasnjëshme të të nxehtit i çuan temperaturat në mbi 30 gradë Celsius.

Kjo ka çuar në një rritje të numrit të zjarreve më të mëdha, sipas të dhënave nga Sistemi Europian i Informacionit për Zjarret Pyjore (EFFIS).

Nxehtësia ekstreme po shkakton gjithashtu rritje të vdekjeve. Në Francë, më shumë se 2.000 vdekje gjatë javës së fundit të qershorit iu atribuuan të nxehtit. Franca regjistroi ditën më të nxehtë të historisë së saj më 24 qershor.

Numri i vdekjeve u rrit me 29% në javën e fundit të qershorit krahasuar me javën paraprake, sipas ministres franceze të Shëndetësisë, Stephanie Rist, e cila vuri në dukje një “rritje të qartë” të vdekjeve te personat mbi moshën 45 vjeç.

Dhe kjo prirje ka të ngjarë të vazhdojë në vitet e ardhshme, pasi Europa është kontinenti që po ngrohet më shpejt në botë, me temperaturat që po rriten më shumë se dy herë më shpejt se mesatarja globale, sipas Shërbimit të Ndryshimeve Klimatike Copernicus të Bashkimit Europian.