Zyrtari i VAR-it mohon gjestin kontrovers

Arbitri australian u shfaq në ekran duke formuar me dorë një simbol të ngjashëm me shenjën e përmbysur “OK”, gjest që në disa raste është interpretuar si simbol i lidhur me grupe ekstremiste të supremacisë së bardhë. Pamjet u përhapën me shpejtësi në internet dhe nxitën reagime të shumta.

Pas incidentit, FIFA nisi një hetim për të shqyrtuar rastin. Megjithatë, pas analizimit të pamjeve nga qendra e arbitrimit në Dallas, organizata botërore e futbollit njoftoi se nuk kishte gjetur asnjë shkelje disiplinore nga Evans.

Vetë arbitri mohoi kategorikisht se gjesti ishte bërë me vetëdije ose se kishte ndonjë mesazh të fshehtë.

“Mënyra se si është paraqitur ky incident nuk më përfaqëson aspak. E kuptoj se si është interpretuar gjesti dhe më vjen keq për këtë, por dua të jem shumë i qartë: nuk e kam bërë me vetëdije apo qëllimisht simbolin që është përmendur,” deklaroi Evans.

38-vjeçari shpjegoi se lëvizja ishte një zakon i pavetëdijshëm që e përsërit shpesh kur mban stilolaps në dorë.

“Pamjet e marra më vonë gjatë ndeshjes tregojnë se e kam përsëritur të njëjtën lëvizje disa herë. Të jem pjesë e arbitrimit në Kupën e Botës është nderi më i madh i karrierës sime dhe mezi pres të vazhdoj të ndihmoj kolegët e mi gjatë pjesës së mbetur të turneut,” shtoi ai.

Incidenti tërhoqi vëmendjen edhe të organizatave kundër diskriminimit. Organizata Fare, e cila bashkëpunon me FIFA-n dhe UEFA-n në çështjet e diskriminimit në futboll, kërkoi që rasti të shqyrtohej me kujdes.

Sipas përfaqësuesve të saj, gjesti i përdorur ngjante me simbolin e njohur “OK” të përmbysur, i cili në disa raste është përdorur nga grupime të ekstremit të djathtë.

Megjithatë, FIFA ka mbyllur hetimin pa marrë masa disiplinore ndaj Evansit. Arbitri australian do të vazhdojë të jetë pjesë e ekipit të arbitrimit në Kupën e Botës, ndërsa organizatorët shpresojnë që polemika të tilla të mos përsëriten gjatë ndeshjeve të ardhshme./ Periskopi/