FIFA e ‘dëgjon’ Tuchelin, ndryshon procedurën para fillimit të ndeshjes

“Tre Luanët” e nisën në mënyrë ideale fushatën e tyre në Kupën e Botës të mërkurën, pasi golat e Harry Kane (2), Jude Bellinghamit dhe Marcus Rashfordit siguruan një fitore 4-2 ndaj Kroacisë.

Si rezultat, Tucheli u bë trajneri i parë i huaj që fiton ndeshjen e tij të parë si përzgjedhës i Anglisë në një turne madhor.

Ishte një pasdite e paharrueshme për Tuchelin, megjithëse përvoja e tij e parë si trajner në Kupën e Botës u “prish pak” para se të niste ndeshja.

Teksa lojtarët e Anglisë u mblodhën rreth rrethit qendror për të kënduar himnin kombëtar, fotografët i bllokuan pamjen Tuchelit dhe nuk i dhanë mundësi të shihte asnjërin prej futbollistëve të tij.

Pamjet treguan më pas një Tuchel të irrituar duke u folur fotografëve.

“Jeni shumë afër, djema, shumë afër,” tha ai në stadiumin “AT&T” në Teksas.

“Jeni aq afër sa nuk mund të shoh asgjë”, shtoi ai.

Duke folur në konferencën për shtyp pas ndeshjes, gjermani u ankua për incidentin.

“Duhet t’ju them diçka: po i lutem FIFA-s ta ndryshojë pozicionin e fotografëve gjatë himnit kombëtar, sepse nuk munda ta shihja ekipin tim gjatë himnit,” tha Tucheli.

“Kam pritur për këtë moment. Ishte një moment shumë, shumë i veçantë sot dhe unë qëndroja përballë një muri me 50 fotografë, vetëm gjysmë metri larg, dhe nuk munda të shihja asnjë lojtar të vetëm”, vazhdoi ai.

“Kjo ma prishi pak përvojën,” shtoi ai.

“Është shumë emocionuese. Kur isha i ri dhe kur fillova të trajnoja, ishte tepër e madhe edhe për ta ëndërruar një rast të tillë”, u shpreh Tucheli.

Pas ankesës së Tuchelit, FIFA tani ka përditësuar udhëzimet e saj, duke u dhënë trajnerëve të kombëtareve mundësinë të qëndrojnë në të majtë ose në të djathtë të fotografëve gjatë ceremonisë para ndeshjes.

Ndërkohë, Declan Rice u zëvendësua në minutën e 72-të të ndeshjes së Anglisë kundër Kroacisë. Teksa po shkonte drejt bankinës, ai u pa duke çaluar, gjë që ngriti shqetësime për gjendjen e tij fizike.

Më vonë, Tucheli dha një përditësim për mesfushorin e Arsenalit.

“Declan pati disa humbje të pazakonta të topit dhe vura re një shqetësim tek ai,” tha ai për “ITV”.

“Pastaj e pyeta dhe ai më tregoi menjëherë pjesën e poshtme të shpinës dhe pjesën e sipërme të kofshës së pasme, ku ndiente parehati. Nuk doja të merrja asnjë rrezik. Nëse e nxjerr Declanin nga loja, gjë që nuk dua ta bëj kurrë, ishte momenti për ta mbrojtur. Mendoj se Reece James bëri shumë mirë që e zëvendësoi në mesfushë. Ai zhvilloi një ndeshje fantastike. Kjo është e gjitha”, tha gjermani.

“Shpresoj që të mos jetë asgjë më serioze. Declan më siguroi në fund duke më thënë: ‘Jam mirë, jam mirë’. E njoh këtë lloj shqetësimi. Do të kujdesemi për të dhe nuk është diçka e madhe për t’u shqetësuar”, shtoi Tucheli.

Vetë Rice deklaroi pas ndeshjes se ishte “në gjendje perfekte”, megjithëse pranoi se kishte kohë që po luante me këtë problem fizik./GazetaExpress/