Prenë pemën ikonike shekullore në Murin e Hadrianit: Mbi tetë vite burg për 2 autorët që u mburrën me krimin mjedisor

Ngjarja ndodhi më 27 shtator 2023, kur ata udhëtuan 30 milje nga Cumbria në Northumberland përmes një stuhie, dhe e prenë pemën brenda më pak se tre minutash.

Sipas prokurorëve, “misioni idiot” i tyre shkaktoi mbi 620,000 paund dëme për pemën dhe më shumë se 1.000 paund dëme për Murin e Hadrianit. Ata morën një copë nga trungu si trofe, e cila nuk është rikuperuar ende, dhe duket se e shijuan vëmendjen mediatike.

Në gjykatën e Newcastle Crown Court, Adam Carruthers, 32 vjeç, dhe Daniel Graham, 39 vjeç, u shpallën fajtorë me akuza për dëmtim të qëllimshëm. Gjatë gjyqit, u publikua edhe videoja e momentit të prerjes së pemës.

Gjyqtarja, zonja Justice Lambert, i quajti ata bashkëfajtorë dhe tha se veprimet e tyre ishin të motivuara nga dëshira për famë. “Ju shijuat vëmendjen që morët, dhe u ndiet krenarë për krimin që gjithë vendi po fliste”, u tha ajo.

Dyshja, dikur miq të ngushtë, kanë rënë në konflikt që pas arrestimit dhe kanë fajësuar njëri-tjetrin për incidentin. Ata nuk dhanë asnjë shpjegim pse e kishin në shënjestër pikërisht këtë pemë të dashur për britanikët.

Pema, e cila kishte qëndruar për më shumë se 100 vjet në vendin panoramik, zinte një vend në kulturën popullore dhe u shfaq në filmin e Kevin Costner të vitit 1991, Robin Hood: Prince Of Thieves.

Gjithashtu përbënte pjesë të jetës personale të njerëzve, si skena e propozimeve për martesë, shpërndarja e hirit dhe fotografive të panumërta.

Një pjesë 1.8 metra e trungut tani është në ekspozitë publike në Qendrën Kombëtare të Zbulimit të Peizazhit The Sill, rreth dy milje larg vendit ku ndodhej dikur, ndërsa 49 fidanë të marrë nga pema janë konservuar nga National Trust./Periskopi/