Zelensky shpreson për “masa të forta” nga SHBA nëse Rusia s’e pranon propozimin për armëpushim

“Sipas asaj që kuptoj, ne mund të presim hapa të fortë. Nuk e di detajet, por po flasim për masa përkatëse sanksionuese dhe forcimin e Ukrainës”, tha Zelensky.

Duke folur para gazetarëve të mërkurën, Zelensky tha se Ukraina pranoi një armëpushim 30-ditor të propozuar nga SHBA, i cili do të përfshinte një ndalim të luftimeve në det, në ajër dhe në tokë.

Ai tha se kjo periudhë do të përdorej për të përcaktuar kushtet e një marrëveshjeje të ardhshme paqeje – përfshirë çfarë lloj garancish sigurie mund të ofrohen nga aleatët perëndimorë të Ukrainës.

“Çdo gjë varet nga Rusia. SHBA ndërmorën hapa, Ukraina e bëri të qartë pozicionin e saj. Tani Rusia duhet të përgjigjet”, tha lideri ukrainas në konferencën për shtyp në Kyiv.

Zelensky u pyet disa herë se çfarë do të ndodhte nëse Rusia do ta thyente armëpushimin 30-ditor, por ai nuk dha përgjigje konkrete – duke sugjeruar se detajet e çfarëdo armëpushimi ende duhet të përcaktohen.

Rusia deri më tani ka refuzuar ta komentojë planin, me zëdhënësin e Kremlinit, Dmitry Peskov, që tha më herët të mërkurën se Moska po pret që të informohet nga zyrtarët amerikanë.