Kica- Xhelili: Nuk formojmë qeveri jostabile veç për hir të pushtetit

Deputetja nga radhët e Lidhjes Demokratike të Kosovës, Doarsa Kica-Xhelili, thotë se partia që përfaqëson e ka bërë të ditur qartë gjatë fushatës se LDK-ja nuk hyn në qeveri të cilën nuk e udhëheq Lumir Abdixhiku.

Ajo thotë se mjaft i qartë është bërë edhe hendeku i thellë me LVV-në dhe si LDK-ja nuk është parti “bllok opozitare”.

“Duke e vendosur LDK-në para interesave personale, ne po e vendosim Kosovën para gjithçkaje tjetër. Për ne, dobësimi i LDK-ja nënkupton dobësim të vet Kosovës. Prandaj, gabimet nuk i përsërisim! Sot, i qëndrojmë besnik elektoratit tonë, qëndrimeve tona”, shkroi ajo në Facebook.

Kica-Xhelili shtoi se nëse vendi e do LDK-në në opozitë, si parti të tretë, aty do e ketë, duke konfirmuar se nuk ka pritshmëri që “kundërshtarët” e LDK-së të pajtohen me ta.

Ky është postimi i plotë i saj:

Në fushatë ishim kristal të qartë! Janë tre gjëra që i kemi përsëritur vazhdimisht:

1. Kemi hendek të thellë me VV;
2. LDK nuk hyn në qeveri të cilën nuk e udhëheq LDK (Lumir Abdixhiku);
3. Nuk jemi parti “bllok opozitare”. Jemi LDK-ja. Si e tillë, nuk jemi grup me të tjerët. Nuk formojmë qeveri jostabile veç për hir të pushtetit.

Mbi këto premisa, ne u votuam! Votuesi ynë, na dha besimin mbi këto qëndrime! Votuesi ynë, si para, njësoj pas zgjedhjeve – e gjen LDK të pandryshueshme në premtimet e saj.

Nëse ky vend sot na do në opozitë, si parti të tretë, aty do të na ketë!

Duke e vendosur LDK-në para interesave personale, ne po e vendosim Kosovën para gjithçkaje tjetër. Për ne, dobësimi i LDK nënkupton dobësim të vet Kosovës. Prandaj, gabimet nuk i përsërisim! Sot, i qëndrojmë besnik elektoratit tonë, qëndrimeve tona.

Sot, nuk pres që kundërshtarët e LDK të pajtohen me ne. Në fakt, mospajtimi i tyre konfirmon se jemi në rrugë të duhur të përfaqësimit të votuesit tonë.

Sot, jemi 65 mijë më shumë se në 2021!
Një ditë, do të ringritemi si një!