5 orë më parëGjuha e Kurteshit – Reagon Rrjeti SafeJournalists: Retorika kërcënuese nga një zyrtar publik vë në rrezik gazetarët në Kosovë
Periskopi(një vit më parë)
(një vit më parë)Rrjeti SafeJournalists dënon ashpër gjuhën kërcënuese dhe denigruese të përdorur nga Sami Kurteshi, anëtar i Komisionit Qendror të Zgjedhjeve (KQZ), kundër Asociacionit të Gazetarëve të Kosovës (AGK) dhe Rrjetit të Grave Gazetare të Kosovës (RrGGK). “Ne u bëjmë thirrje institucioneve përkatëse të ndërmarrin masa të menjëhershme për të siguruar mbrojtjen e gazetarëve dhe lirinë e […]
“Ne u bëjmë thirrje institucioneve përkatëse të ndërmarrin masa të menjëhershme për të siguruar mbrojtjen e gazetarëve dhe lirinë e medias.”
Në një deklaratë publike, Kurteshi i quajti AGK-në dhe RrGGK-në si një “Aleancë e Grupeve Kriminale”. Një gjuhë e tillë nxitëse delegjitimon punën jetike të organizatave të gazetarëve, i ekspozon ata ndaj rrezikut të mundshëm dhe krijon një ambient armiqësor për profesionistët e medias, veçanërisht për gratë gazetare, të cilat tashmë përballen me kërcënime.
“Jemi të shokuar që partia në pushtet, Vetëvendosje, vazhdon të qëndrojë indiferente ndaj sjelljes skandaloze të anëtarit të saj në Komisionin Qendror të Zgjedhjeve, Sami Kurteshi, ndaj mediave dhe gazetarëve” deklaron Xhemajl Rexha, kryetar i bordit të AGK-së. “Akuzat janë shumë shqetësuese dhe rrezikojnë sigurinë e gazetarëve. VV duhet ta shkarkojë menjëherë Kurteshin nga ky institucion i rëndësishëm shtetëror.”
Kurteshi është një zyrtar i lartë publik, i emëruar në një institucion thelbësor për integritetin demokratik të Kosovës. Fjalët e tij kanë peshë të madhe dhe duhet të trajtohen me seriozitet maksimal nga autoritetet e zbatimit të ligjit.
Rrjeti SafeJournalists i bën thirrje Prokurorit të Shtetit të hetojë deklaratat e Sami Kurteshit. Nëse ai posedon ndonjë provë që mbështet akuzat e tij, ato duhet të ekzaminohen në mënyrë formale. Nëse jo, akuzat e tij të pabaza duhet të dënohen publikisht, pasi tolerimi i një retorike të tillë krijon një precedent të rrezikshëm dhe rrezikon më tej profesionistët e medias.
Lejimi i sulmeve të pabazuara dhe shpifëse nga zyrtarët publikë kontribuon në krijimin e një klime frike dhe autocensure. Kjo cenon aftësinë e gazetarëve për të vepruar lirshëm dhe të sigurt, duke vënë në rrezik demokracinë dhe interesin publik.
Ne i bëjmë thirrje Kryeministrit Albin Kurti dhe partisë në pushtet që të distancohen nga retorika e rrezikshme e Kurteshit dhe ta dënojnë atë publikisht. Udhëheqësit politikë duhet të sigurojnë që zyrtarët e tyre të mos përfshihen në sulme verbale që rrezikojnë gazetarët.
Rrjeti SafeJournalists shpreh solidaritet të plotë me AGK-në dhe RrGGK-në dhe do të informojë aktorët kombëtarë dhe ndërkombëtarë për këtë zhvillim shqetësues.
Çdo sulm ndaj gazetarëve është një sulm ndaj demokracisë, interesit publik dhe të drejtave themelore të njeriut.
