Abdixhiku: Arben Gashi e Paris Guri do të jenë deputetë të ardhshëm

Kryetari i LDK-së, Lumir Abdixhiku, ka folur për mënyrën se si janë renditur kandidatët e kësaj partie në listën për deputetë, teksa bëri të ditur se Arben Gashi dhe Paris Guri do të jenë deputetët e ardhshëm në Kuvendin e Kosovës.

Abdixhiku tha se renditjen e kandidatëve e kanë bërë në mënyrë parimore, ku tha se fillimisht kanë vendosur nënkryetarët e partisë, pastaj kryetarët e komunave, ish-kryeministrin e me radhë.

“Në qoftë se do të kisha aq fuqi sa të përcaktoja deputetët e ardhshëm të Kosovës, do të isha shumë i lumtur. Por, ndoshta identifikimi me kryetarin e partisë ose me frymën që e sjelli unë në LDK, ndoshta është e pëlqyeshme”.

“Njerëzit që identifikohen me kryetarin e partisë, marrin vota pak më tepër sepse besojnë se votuesit e LDK-së e mbështesin. Është e mundshme që njerëzit që identifikohen me reformën e partisë, të marrin pëlqim më të madh”, tha Abdixhiku në Rubikon në Klan Kosova.

Më tej, kreu i LDK-së tha se nuk e përcakton votuesin kosovar se si voton dhe as nuk e cakton listën e kandidatëve, teksa tha se po të kishin lista të mbyllura, përgjegjësia do të ishte e tij se si do t’i rendiste kandidatët që do ta merrnin mandatin.

“Listat janë të hapura, ajo çka mund të them është se jam shumë i kënaqur me votën e dhënë për mua, për bartësin e listës, diku 86 për qind, që është një shenjë e mbështetjes së votuesit të LDK-së për kryetarin e partisë. Do të largohen disa kryetarë të komunave nga lista e deputetëve, kjo është një familje, gara ka përfunduar më 9 shkurt brenda kësaj familje”.

“Do të doja që ta kisha atë fuqi që të përcaktoja njerëzit, por s’e ka asnjë lider. Pa Imri Ahmetin dhe Gazmend Muhaxherin, do ta kishim Arben Gashin dhe Paris Gurin, atëherë do të kompletohej lista e përafërt para certifikimit të rezultateve”, tha ai./Periskopi/