15 vjet në Gjykatë për pronën në zonën e aeroportit, Beqir Zeka: Rexhepin e mbështet VV-ja, përmes lidhjeve me Besnik Bislimin

Beqir Zeka dhe vëllai i tij, Gani Zeka, pretendojnë se prej vitit 2009 u është mohuar e drejta për të shfrytëzuar pronën e tyre në Zonën Kadastrale Vrellë e Goleshit, afër Aeroportit “Adem Jashari”, dhe kërkojnë rikthimin paqësor në objektin që ata ndërtuan së bashku me vëllain e tyre, Rexhep Zeka.

Sipas Beqir Zekës, objekti në këtë parcelë është ndërtuar në vitin 2007 nga të tre vëllezërit, secili me nga 1/3 e pronësisë. Megjithatë, ai pretendon se në vitin 2009, Rexhep Zeka ka uzurpuar 2/3 e objektit, duke përjashtuar ata nga përdorimi i pronës së tyre. Çështja është në proces gjyqësor prej 15 vitesh pa një zgjidhje përfundimtare.

Zeka akuzon institucionet për zvarritje të procesit dhe pretendon se Rexhep Zeka ka mbështetje politike nga Lëvizja Vetëvendosje, përmes lidhjeve me zëvendëskryeministrin Besnik Bislimi, ku vajza e Rexhep Zekës, Kaltrina Zeka, punon si shefe e stafit të tij.

Për këtë arsye, Beqir dhe Gani Zeka kanë vendosur që më 14 mars 2025, në ora 10:00, të hyjnë në pronën e tyre dhe kërkojnë praninë e mediave për të dokumentuar këtë veprim, duke theksuar se synojnë një rikthim paqësor. Ata gjithashtu kanë bashkëngjitur dokumente pronësore si dëshmi të të drejtave të tyre.

Mbetet të shihet nëse institucionet përgjegjëse do të ndërhyjnë për zgjidhjen e këtij kontesti të gjatë ligjor. /Kosova.info/