Trump përplaset brenda Shtëpisë së Bardhë me guvernatoren demokrate të Maine, ajo ia kthen: Shihemi në gjyq

Presidenti Donald Trump u përplas me guvernatoren demokrate të Maine, Janet Mills, të premten për fondet federale që ai kërcënoi t’i ndalonte nga shteti për atletët transgjinorë që marrin pjesë në sportet e vajzave dhe grave.

Trump po iu drejtohej guvernatorëve demokratë dhe republikanë në darkën shtetërore në Shtëpinë e Bardhë të premten, kur ai përmendi urdhrin e tij të fundit ekzekutiv që ndalon sportistët trans të luajnë në sporte për gra, shkruan Reuters, transmeton Gazeta Express.

Ai më pas iu drejtua guvernatores së Maine dhe e pyeti nëse shteti do të pajtohej, duke bërë që Mills të kundërshtonte.

“Më mirë bëjeni sepse nuk do të merrni fonde federale”, i tha Trump Mills.

Guvernatorja më pas u përball me Trump dhe tha: “Ne do të ndjekim ligjin, zotëri. Shihemi në gjykatë”.

Trump u përgjigj me: “Gëzoje jetën guvernatore, sepse nuk mendoj se do të jesh zyrtare e zgjedhur më pas”.

Trump shpesh kritikonte atletët transgjinorë gjatë fushatës. Urdhri i tij ekzekutiv i nënshkruar së fundmi është vlerësuar nga mbështetësit duke thënë se do të rivendosë drejtësinë, por kritikët thonë se ai shkel të drejtat e një pakice të vogël atletësh.

Nga 510,000 atletë që konkurrojnë në nivel kolegjial, ka më pak se 10 që identifikohen publikisht si transgjinorë, tha presidenti i NCAA Charlie Baker në janar.

Trump po mbështetet në Departamentin Federal të Arsimit për të arritur qëllimin e direktivës përmes një interpretimi të rishikuar të ligjeve federale të të drejtave civile. Shkollat ​​që nuk ndjekin këto ligje mund të humbasin fondet federale.

Videon mund ta shikoni KËTU