“SPAK, jo redaksi lajmesh”, Rama: Ku ka korrupsion, të përdoret shpata

Në dëgjesën e Grupit Parlamentar të PS, ai tha se SPAK nuk duhet të bëjë redaksinë e lajmeve pasi është votuar për të qenë një mjet për të goditur kudo ku ka korrupsion, qoftë brenda PS apo jashtë saj.

“Kam një sugjerim për prokurorët e SPAK. Në vend që të merren me deklaratat e mia, dhe të bëjnë njoftime për shtyp, të bëjnë punën e tyre. E kanë të gjithë mbështetjen tonë, të dëgjojnë këto që them dhe ne themi si kritika dhe shqetësime konstruktive. Për ne, për mua dhe PS, SPAK, GJKKO rrojnë 1 mijë vjet, nuk i vjen e keqja dhe shqetësim nga ne dhe të mos i ndjekin mediat sikur janë parti politike dhe të ndërpresin marrëdhëniet me gazetarët specialë. Nuk kam asnjë gjë me gazetarët, por të ndërpresin marrëdhëniet me gazetarët specialë. Të mos furnizojnë miletin me sekrete hetimore, të mos sillen si redaksi gazetash, portalesh e kanalesh dhe të bëjnë punën e tyre”.

“Sa herë, kurdoherë, kudoqoftë, që do të kapin korrupsion, atë shpatën ta hapin krahun me të gjithë forcën. Por korrupsion ama. Kemi ngritur një prokurori speciale për korrupsionin, por jo një institucion që të bëjë dhe Gjykatën Administrative, Kontrollin e Lartë të Shtetit, Inspektoriatin e Lartë të Deklarimit të pasurive, dhe gjykatësin dhe prokurorin. E kemi ngritur si një armë shumë të fuqishme për të luftuar korrupsionin brenda nesh, rreth nesh, mbrapa e para nesh, lart e poshtë, kudo që të jetë por korrupsionin me prova, procese të rregullta me respekt për lirinë e të drejtat e njeriut dhe të mos kundërshtojnë sikur janë parti politike. Të mos merren me statistika dhe shifra, duhet të garantojnë se fajtorët të shkojnë në burg dhe të pafajshmit të mos traumatizohen për gjithë jetën”, tha Rama.