Prokuroria Speciale: I arrestuari për krime lufte është D.R., i nacionalitetit serb

Prokuroria Speciale ka dhënë detaje për një person që u arrestua sot nën dyshimin se ka kryer veprën penale “Krim i luftës kundër popullsisë civile”. I dyshuari është D.R. i nacionalitetit serb.

“Prokuroria Speciale e Republikës së Kosovës, njofton opinionin publik se sot ka ndaluar  D.R, i nacionalitetit serb për shkak të dyshimit se ka kryer veprën penale “Krim i luftës kundër popullsisë civile”, e sanksionuar me nenin 142 të Ligjit Penal të ish- Jugosllavisë, si ligj në fuqi në kohën e kryerjes së veprës penale.”

Ai dyshohet se gjatë kohës së luftës në Kosovë, në vitin 1999 ka kryer krime të luftës ndaj popullsisë civile në regjionin e Gjakovës.

I dyshuari është ndaluar për 48 orë.

“Me urdhër të Prokurorisë Speciale, i pandehuri gjendet nën masën e arrestit të përkohshëm dhe ndalimit për 48 orë dhe brenda afatit ligjor do të dërgohet para Gjyqtarit të procedurës paraprake, për procedurë të mëtutjeshme.”

Prokuroria Speciale e Republikës së Kosovës ndalon një person të dyshuar për kryerjen e veprës penale Krime Lufte
…

Posted by Sistemi Prokurorial on Tuesday, February 25, 2025