Prishtina Parking del me sqarim për biçikletat që u panë në një oborr në Prishtinë

Pasi është shpërndarë një fotografi në rrjetet sociale, ku këto biçikleta janë fotografuar në një hapësirë të jashtme në lagjen ‘Kalabria’ në Prishtinë, ‘Prishtina Parking’ ka reaguar duke thënë se ato janë ekspozuar në diell.

Postimi i plotë:

Prishtina BikesTë nderuar qytetarë,Për shkak të stinës së dimrit, ne kemi marrë masa të posaçme për të siguruar mbrojtjen e biçikletave të “Prishtina Bikes” duke i vendosur në një hapësirë të mbyllur dhe të monitoruar vazhdimisht me kamera, për të shmangur çdo dëm të mundshëm.

Biçikletat do të vendosen në stacione më dt. 01.03.2025. Aktualisht, jemi në fazën e mbushjes së biçikletave me rrymë elektrike, proces i cili zgjat 24 orë për një biçikletë, një hap kyç për funksionimin e duhur të tyre. Biçikletat përgjatë tre muajve kanë qenë të vendosura në ambient të mbyllur. Mirëpo, pjesë e procesit të mbushjes është ekspozimi i tyre në diell, duke përdorur energjinë solare për të optimizuar mbushjen si dhe për të garantuar performancë afatgjatë të biçikletave.

Biçikletat janë vendosur në një zonë të sigurtë në lagjen Kalabria, nën vëzhgimin e kamerave dhe janë nën mbikëqyrjen tonë të vazhdueshme, duke siguruar që çdo detaj të jetë nën kontroll.

Ju faleminderit për mirëkuptimin tuaj!