Haradinaj për dënimin e Calit: Nuk i jemi frikësuar asnjëherë drejtësisë, por padrejtësisë

Daut Haradinaj nga Aleanca për Ardhmërinë e Kosovës (AAK), ka shkruar në Facebook për ndryshimet e mëdha që po ndodhin në botë.

Ndërkaq Kosova, siç thotë Haradinaj është në një proces të tejzgjatur zgjedhor. Ai përmendi edhe për faturat e fryra të energjisë, si dhe rritjen e çmimeve bazike të energjisë.

Haradinaj ka shkruar edhe për dënimin me burgim që iu dha Salih Mustafës (Cali). Sipas Haradinajt, ndaj Gjykatës Speciale duhet “ta ngremë zërin të gjithë, pa dallim, dhe të kërkojmë drejtësi”.

Postimi i plotë:

Në këtë mjegull lajmesh të njëpasnjëshme, shumica prej tyre jo të mira nga Kosova e rreth Kosovës, mes një procesi të tejzgjatur zgjedhor dhe një bote që ndryshon çdo sekondë para syve tanë – e ne mbetemi vetëm spektatorë, të larguar e të përjashtuar, të zhytur në fatura të fryra, nga energjia e deri te artikujt më bazikë, sot, luksi i të qenit i lirë dhe shtet, luksi i zgjedhjeve dhe çdo gjëje që frymon në Kosovë, i arritur përmes një lëvizjeje aq të madhe e të lavdishme si UÇK-ja, u dënua dhe u riafirmua edhe një herë në Hagë, duke vulosur dënimin e Calit.

Nuk e di cili është fati i këtij legjislacioni të Kosovës, por di që do të bëj gjithçka brenda kapaciteteve të një deputeti për të vënë në lëvizje një mekanizëm që do të hedhë dritë mbi këtë proces, duke kërkuar llogaridhënie për gjithë ecurinë e tij.

Premtimet e mia nuk ishin dhe nuk janë elektorale; ato janë përtej meje, janë për UÇK-në.

Ne nuk i jemi frikësuar asnjëherë drejtësisë, por padrejtësisë.

Prandaj, ta ngremë zërin të gjithë, pa dallim, dhe të kërkojmë drejtësi!