5 orë më parëFule: Është zhdukur plotësisht i ashtuquajturi motor i zgjerimit në BE
Periskopi(një vit më parë)
(një vit më parë)Ish-Komisioneri për Zgjerimin në Bashkimin Evropian, Stefan Fule, ka folur për shanset reale për një zgjerim të mundshëm të BE-së me vendet kandidate të Ballkanit Perëndimor. Sipas Fule, shtetet kandidate po përgatiten për zgjerim, por nuk duket të ndodhë e njëjta gjë me institucionet dhe shtetet anëtare të BE-së. Fule heziton të tregojë nëse kjo […]
Sipas Fule, shtetet kandidate po përgatiten për zgjerim, por nuk duket të ndodhë e njëjta gjë me institucionet dhe shtetet anëtare të BE-së.
Fule heziton të tregojë nëse kjo është një çështje vullneti politik apo plotësimi reformash, pasi sipas tij “jo të gjitha shtetet anëtare e kuptojnë se çfarë duhet bërë në mënyrë që BE-ja të jetë një organizatë funksionale” dhe për më tepër, për të mundësuar anëtarësimin e disa vendeve kandidate, teksa shton se ekziston edhe një lloj dikotomie midis shteteve.
Bashkëbiseduesi i Ditmir Bushatit në Podcastin “Public Square”, Fule shpreh bindjen se është zhdukur plotësisht efekti i motivimit apo i ashtuquajturi motori i zgjerimit, që për pasojë ka krijuar një status quo në rastin e Ballkanit Perëndimor, që nënkupton që jo domosdoshmërisht duhet të reformoheni, por duhet që ta shisni këtë evropianizim, apo kinse procesin e reformës, për hir të një stabiliteti të rrejshëm.
Fule thotë se “në ditët e sotme aspekti i sigurisë është i një rëndësie të madhe për BE-në, për ta përfunduar këtë detyrë, sepse kur era është e fortë, ju duhet ose të braktisni projekte të caktuara, ose të shkoni nga pas me një vendosmëri më të madhe dhe me vullnet të fortë. Unë shoh vullnetin dhe qëllimin për të shkuar në atë drejtim. Por na duhet që ai motor të rindizet. Ne kemi nevojë që ato dy procese të ecin paralelisht hap pas hapi në mënyrë që të themi: ‘Kjo punë përfundoi!’”.
Bushati thotë se pushtimi i Ukrainës nga Rusia, por dhe një president i ri, në detyrë në Shtëpinë e Bardhë, në një periudhë kur BE-ja është disi e ndarë gjeopolitikisht kanë krijuar një situatë të re për sa i përket sigurisë në Evropë. Por, për Fule këto dy zhvillime janë të rëndësishme pasi që kanë potencialin për t’i çuar gjërat përpara.
Bashkëbiseduesit duke folur për Ballkanin Perëndimor iu referuan domosdoshmërisë për vullnet politik nga BE dhe reforma të njëmendta nga vendet kandidate si mënyrën e vetme për t’u bërë pjesë e BE brenda nja afati të shpejtë.
“Kjo do të ishte e vetmja mënyrë për të ruajtur rëndësinë e BE-së pasi ‘dështimi në këtë pikë do të kishte pasoja dramatike jo vetëm për shtetet që ende po trokasin në dyert tona, dhe që unë i respektoj me gjithë zemër, por edhe për vetë BE-në’”, tha Fule.
