Mediat urdhërohen që të largohen nga seanca gjyqësore ndaj dy të akuzuarve për spiunazh

Gjatë seancës gjyqësore ndaj Bedri Shabanit, i akuzuar për spiunazh, Gjykata ka kontaktuar menjëherë me Qendrën e Paraburgimit në Gjilan për të marrë informacione lidhur me gjendjen e tij shëndetësore.Sipas njoftimit nga trupi gjykues, përmes emailit është kërkuar sqarim zyrtar për gjendjen shëndetësore të të akuzuarit.

Nga doktori i kësaj qendre është marrë përgjigje se i pandehuri Bedri Shabani më datë 11.11.2025 është lajmëruar për konsultë te mjeku i burgut.Po ashtu, të njëjtit i është rekomanduar terapi dhe konsultë te specialistët përkatës.

Duke qenë se përgjigjja ishte e mangët, gjykata ka kontaktuar sërish me njësinë përkatëse në burg për t’u interesuar nëse Shabani është vizituar sot nga mjeku.Në bazë të përgjigjes së marrë, rezulton se edhe sot i akuzuari ka bërë vizitë dhe se parametrat e tij kanë qenë brenda vlerave normale.

Gjykata ka kërkuar që kjo përgjigje të dërgohet me shkrim dhe aktualisht është në pritje për ta dokumentuar.Në pritje të kësaj përgjigjeje dhe duke marrë parasysh shqetësimet që ka ngritur Shabani – të cilat gjykata për momentin nuk dëshiron t’i bëjë publike.

Ndërkohë, avokati i të akuzuarit, Besnik Berisha, ka kërkuar që mediat të largohen nga salla dhe që çështja të trajtohet pa publicitet.

Prokurori ka theksuar se “ne jemi juristë dhe nuk jemi mjekë, prandaj nuk ka nevojë që në këtë fazë të elaborohet çështja e diagnozës”, duke ia lënë në diskrecion gjykatës vendimin për largimin e publikut.

Pas konsultimit, trupi gjykues ka marrë vendim që mediat të largohen nga salla e gjykimit.