Zyrtare: I dyshuari për vrasjen e 10 personave në Mal të Zi vdes nga plagët që ia shkaktoi vetës

Ministri i Punëve të Brendshme i Malit të Zi Danilo Sharanoviq tha se Aco Martinoviq vdiq gjatë transportit për në Qendrën Klinike të Malit të Zi.

Ai tha se operacioni policor në kërkim të Martinoviqit është kryer me sukses, kanë raportuarmediat në Malin e Zi.

Sharanoviq ka deklaruar se Martinoviq ka tentuar të bëjë vetëvrasje por s’ ka vdekur në vend.

U.D. I Drejtorit të Drejtorisë së Policisë, Llazar Shqepanoviq, tha se Martinoviqi ndodhej në vendbanimin Humci.

Ai tha se nuk dihet motivi i vrasjeve, ndërsa viktimat kanë qenë shokët dhe kumbarët e tij.

Të plagosurit janë në gjendje stabile, tha Shqepanoviq.

Së paku 10 persona, mes të cilëve dy fëmijë janë vrarë sot në një krim masiv në Cetinje, ndërsa mjekët e Qendrës Klinike në Podgoricë po luftojnë për jetën e katër të tjerëve.

Martinoviqi e filloi krimin në tavernën “Velestovo”, afër Qendrës Sportive në hyrje të Cetinjes, ku vrau katër persona, dhe më pas në tre lokacione të tjera në qytet, vrau të paktën shtatë persona të tjerë, në mesin e tyre tre gra dhe dy djem, dy vëllezër nga 10 dhe 13 vjeç.