Shtohet popullësia e Lezhës, për 3 vite u lindën 40 foshnje afgane

Ashtu si në të gjithë Shqipërinë edhe në Lezhë numri i lindjeve është ulur ndjeshëm. Sipas të dhënave nga censi i fundit i kryer në Shqipëri, gjatë dekadës së fundit, numri i foshnjave që kanë ardhur në jetë në qarkun e Lezhës është ulur nga 1782 bebe në 2013, në 1082 foshnje në 2023-shin, pra rreth 18% më pak lindje të reja.

Për mjekun obstetër-gjinekolog Zef Zefaj dy janë arsyet kryesore që ndikojnë në rënien e lindjeve, çiftet  që preferojnë të bëhen prindër në moshë të madhe, çka ndikon negativisht edhe në shëndetin riprodhues dhe stili i jetës e vështirësitë ekonomike.

“Ka rënë shumë numri i lindjeve. Po realizuam 800-900 lindje në maternitetin e Lezhës jemi mirë. Ndryshimi i familjeve ka ardhur nga bashkëjetesa familjare, bashkëjetesa e çifteve, një njohje  e gjatë mes djalit dhe vajzës që harrojnë se duhet të bëhen prindër. E neglizhojnë pjesën e parë të prindërimit”, shprehet mjeku.

Për të gjitha familjet dhe çiftet e reja, mjeku e ka një këshillë.

“Asnjëherë mos ta vonojnë lindjen e fëmijës së parë. Fëmijën e parë ta bëjnë sapo të takohet shoku me shokun, pastaj të mendojnë të bëjnë qejf e jetë. Një fëmijë u duhet, duhet për hir të popullsisë dhe fëmija do sjellë fëmijën e kënaqësia do jetë gjithnjë e madhe”, vijon ai.

Edhe në rang vendi, lindjet sipas të dhënave të INSTAT, figurojnë në ulje të ndjeshme. Nga 35.750 lindje në 2013-ën, në 23.617 lindje në vitin 2023.

Spitali Obstetrik-Gjinekologjik në Lezhë është ndërtuar me standarde e kushte bashkëkohore ndërsa gjatë 3 viteve të fundit në maternitetin e Lezhës rezulton të kenë lindur 40 fëmijë të familjeve afgane të vendosura në Shëngjin që prej 2021-shit./Shqiptarja.com